Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 231 Hüküm no: 225 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Kirkor’un tüccar Hacı Ali b. Mehmed ve ortağı Rüstem b. Mustafa’ya olan borcunu kefili olan kaynanası Losik bt. Haçador’un ödemesi Bâ-mühr-i hazret-i efendi Ma‘rûz Tüccârdan el-Hâc Ali b. el-Hâc Mehmed ve şerîki Rüstem b. Mustafa nâm kimesneler dîvân-ı âlîlerinde ma‘kūd meclis-i şer‘de sahibe-i arzuhâl Losik bt. Haçador nâm Nasrâniye ile şahsı ba‘de’t-ta‘rîf terâfu‘larında işbu yedimizde olan iki kıt‘a temessük mûcebince işbu mersûme Losik’in güveğisi gāib ani’l-meclis Abram v. Kirkor nâm zimmî zimmetinde yedimizden müşterâ ve makbûz ma‘lûmü’l-cins ve’l-mikdâr emti‘a-i Hindiye semeninden dört yüz on iki guruş üç rub‘ ve bir def‘a dahi yüz yirmi guruş ki cem‘an beş yüz otuz iki guruş üç rub‘ alacak hakkımıza işbu mesfûre Losik Nasrâniye kefîl ve dâmin olmağla meblağ-ı mezkûru bi-hükmi’l-kefâle mesfûre Losik Nasrâniye’den taleb ederiz deyü ba‘de’d-da‘vâ ve’s-suâl ve’l-inkâr müdde‘iyân-ı merkūmân müdde‘âlarını lede’t-tezkiye adâletleri zâhir olan Vezaver v. Niyaz ve Haçar v. Kirkor şehâdetleriyle mesfûre Losik Nasrâniye muvâcehesinde vech-i şer‘î üzere isbât etmeleriyle mûcebince meblağ-ı mecmû‘-ı mezkûr beş yüz otuz iki guruş üç rub‘u müdde‘iyân-ı merkūmâna bi-hükmi’l-kefâle tamamen edâya mersûme Losik Nasrâniye’ye tenbîh-i şer‘î olunduğu huzûr-ı âlîlerine i‘lâm olundu. Fî 19 min-Cumâdelâhire sene 1162