Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 233 Hüküm no: 228 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. Sekbanbaşı Hasan Ağa ile Havva bt. Ahmed’in ortak oldukları çiftliklerinin kiracısı Ahmed Beşe b. Salih’de olan alacaklarını sulh yoluyla tahsil ettikleri Bâ-mühr-i hazret-i efendi Ma‘rûz Sahibân-ı arzuhâl merhûm Sekbânbaşı Hasan Ağa’nın sulbî oğlu Hüseyin Bey asâleten ve zevcesi Havva bt. Ahmed b. İshak tarafından sulh ve ibrâ-yı âti’l-beyâna vekîl olduğu zât-ı mezbûreyi bi’l-ma‘rifeti’ş-şer‘iye ârifân Kapıkethudâsı Mustafa Ağa b. Hüseyin ve Serdengeçdi ağası Ahmed Ağa b. Abdürrezzak Ağa nâm kimesneler şehâdetleriyle mahzar-ı hasm-ı câhid-i şer‘îde sâbit ve sübût-ı vekâletine hükm-i şer‘î lâhık olan mezbûr Hüseyin Bey vekâleten dîvân-ı âlîlerinde ma‘kūd meclis-i şer‘de Ahmed Beşe b. Salih nâm kimesne mahzarında bin yüz elli sekiz senesinde müvekkilem mezbûre ile yedimizde ale’l-iştirâki’s-seviy mülkümüz olup Büyükçekmece nâhiyesine tâbi‘ Keşli nâm karyede vâki‘ ma‘lûmü’l-hudûd çiftliğimizi sene-i mezbûrede mezbûr Ahmed Beşe’ye yüz guruşa îcâr ol dahi istîcâr ve kabûl edip ba‘dehû sene-i mezbûre evâsıtında bi’t-terâzî fesh-i akd-i icâre çiftlik-i mezbûru ve derûnunda mevcûd âlât ve mahsûlât ve hayvanâtı tarafımızdan vekîlimiz olan gāib ani’l-meclis Veli Çelebi nâm kimesneye teslîm ve biz dahi mezbûr yediyle tesellüm ve kabz edip herbirimiz âharın zimmetini ibrâ ettikden sonra mezbûr Ahmed Beşe’nin çiftlik-i mezbûr derûnunda olan ma‘lûmü’l-mikdâr ağnamından ve sâir hayvanât ve mahsûlâtımızdan iznimiz ile âhara füruht eylediği ağnam ve mahsûlâtdan ba‘de külli’l-hesâb yedi yüz on guruş zimmetinde hakkımız kalıp hatta meblağ-ı mezbûr cihet-i mezkûreden deyni olduğunu ikrâr dahi etmekle taleb ederiz deyü bundan akdem mezbûrdan bi’l-asâle ve bi’l-vekâle da‘vâ eylediğimde ol dahi bi’l-külliye inkâr edip beynimizde ba‘de vukū‘ı’l-münâza‘a el-hâletü hâzihî mezbûr ile da‘vâ-yı mezkûremizden tavassut-ı muslihîn ile yüz altmış guruş bedel-i makbûza bi’l-asâle ve bi’l-vekâle sulh olup bâkī beş yüz elli guruşa ve sâir târih-i i‘lâma gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûr Ahmed Beşe’nin zimmetini bi’l-asâle ve bi’l-vekâle ibrâ-i âm ile ibrâ ve ıskāt eylediğimde ol dahi medfû‘u olan meblağ-ı mezbûr yüz altmış guruşa ve sâire müte‘allika âmme-i da‘vâdan benim ve müvekkilem mezbûrenin zimmetini ibrâ ve ıskāt ve herbirimiz âharın ibrâsını kabûl eyledik dediğini mezbûr Ahmed dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 22 min-Cumâdelâhire sene 1162