Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 234 Hüküm no: 229 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyas mahallesi camii vakfının mütevelliyesi Fâtıma Hatun’un, vakfa ait evin yarısını satın alan Hatice Hatun’un tasarrufunun geçersiz olduğu iddiasıyla açtığı davada haksız bulunduğu Ma‘rûz Mahmiye-i İstanbul’da el-Hâc İlyas mahallesinde binâ eylediği câmi‘-i şerîf vakfının ber-vech-i meşrûtiyyet mütevelliyesi olan sahibe-i arzuhâl Fâtıma Hatun meclis-i şer‘de Hadîce Hatun muvâcehesinde câmi‘-i mezkûr musakafâtından olup mahalle-i mezbûrede vâki‘ lede’l-ahâlî ve’l-müştemilât bir bâb menzilin bi’l-icâreteyn mutasarrıfı arzuhâlde mezkûr müteveffâ Mustafa hayatında maraz-ı mevt ile marîz iken târih-i i‘lâmdan bir ay mukaddem menzil-i mezbûrun nısfını mezbûre Hadice’ye ferâğ ve tefvîz ve ben dahi tasarrufuna izin vermişidim ancak maraz-ı mezkûrda ferâğ-ı mezkûr sahîh olmayıp ve müteveffâ-yı mezbûrun fevti bilâ-veled olmağla mecmû‘-ı menzil-i mezkûr taraf-ı vakfa âid olmağın hâlâ menzil-i mezkûrdan hurûc ve cânib-i vakfa teslîmle mezbûre Hadice’ye tenbîh olunmak bi’t-tevliye murâdımdır deyü da‘vâ ve mezbûre Hadîce Hatun dahi mezbûr Mustafa’nın hâl-i ferâğında olan marazı müddet-i medîde ile maraz-ı müzmin olup esihhâ hükmünde olduğunu iddi‘â ve sıhhat-i bünyesi evlâ olmağla müdde‘âsını ahrâr-ı ricâl-i Müslimînden lede’t-tezkiye adâletleri zâhir olan Ömer Efendi b. Nurullah Efendi ve Feyzullah Efendi b. Ebûbekir Efendi ve Mustafa Efendi b. Süleyman ve Evliyâ Mehmed b. Ebûbekir ve Ahmed Çelebi b. el-Hâc İbrahim ve es-Seyyid Ali b. Mehmed şehâdetleriyle mezbûre Fâtıma muvâcehesinde isbât etmeğin mûcebince mezbûre Fâtıma bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 23 Cumâdelâhire sene 1162