Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 236 Hüküm no: 233 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi v. Yako’nun, Ahmed b. Ali’ye çeşitli mücevher bedelinden kalan alacağını ödemesine yapılan tenbih Ma‘rûz İstanbul’da Ali Paşa-yı Atîk mahallesi ahâlîsinden sahib-i arzuhâl es-Seyyid Ahmed b. es-Seyyid Ali Mahkeme-i Bâb’da meclis-i şer‘de Dîvân-ı âlî çavuşlarından İbrahim Çavuş mübâşeretiyle ihzâr ettirdiği derûn-ı arzuhâlde mastûr Mosi v. Yako nâm Yahûdî muvâcehesinde târih-i i‘lâmdan dört sene mukaddem Mercan’da vâki‘ mesfûr Mosi Yahûdî’nin sâkin olduğu dükkânında eşyâ-i memlûkemden yirmi miskāl altından masnû‘ bir kuşak ve bir tek zümrüd habbe küpe ve iki sagīr elmas taşlı yüzük ve bir zehgîr ve yüz miskāl köhne şeritimi âhara füruht için mesfûr Mosi Yahûdî’nin yediyle müzâyede olundukda ba‘de’l-müzâyede eşyâ-i muharrer[e]-i mezkûre safka-i vâhide ile yüz kırk dört guruşda karâr eyledikde meclis-i mezkûrda eşyâ-yı mezkûreleri yine safka-i vâhide ile mesfûr Mosi Yahûdî’ye yüz elli dört guruşa bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eylediğinden sonra hatta târih-i i‘lâmdan sekiz gün mukaddem İstanbul’da Edirnekapısı kurbünde Acıçeşme ile Salmatomruk beyninde vâki‘ bakkāl dükkânı önünde meblağ-ı mezbûr yüz elli dört guruşu mesfûr Mosi Yahûdî’den taleb eylediğimde mahzar-ı şühûdda ber-vech-i muharrer eşyâ-i mezkûre semenlerinden meblağ-ı mezbûr yüz elli dört guruş zimmetinde deyni olduğunu ikrâr ve işhâd dahi etmişidi deyü ba‘de’d-da‘vâ ve’l-inkâr müdde‘î-i mezbûr es-Seyyid Ahmed ber-vech-i muharrer müdde‘âsını lede’t-tezkiye şehâdetleri makbûle olan el-Hâc Mehmed b. Abdullah ve Ali b. Osman şehâdetleriyle mesfûr Mosi Yahûdî muvâcehesinde vech-i şer‘î üzere isbât etmeğin mûcebiyle meblağ-ı mezbûr yüz elli dört guruşu müdde‘î-i mezbûr es-Seyyid Ahmed’e edâ ve teslîme mesfûr Mosi Yahûdî’ye tenbîh olunduğu huzûr-ı âlîlerine i‘lâm olundu. Fî 26 min-Cumâdelâhire sene 1162