Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 239 Hüküm no: 240 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Abdullah’ın, kiracısı olduğu vakıf evin bir başkasına haksız yere kiralandığını ispat ettiğinden evin kendisine teslim edilmesi Bâ-mühr-i hazret-i efendi Ma‘rûz Sahib-i arzuhâl Abdullah b. Abdullah nâm kimesne meclis-i şer‘-i enverde Nişancı Mehmed Paşa Vakfı müstagallâtından Davud Paşa mahallesinde vâki‘ beher şehr yirmi beş akçe icâreli ma‘lûmü’l-hudûd menzile bi’l-icâreteyn mutasarrıf olan es-Seyyid İbrahim Çelebi b. Mustafa ile vakf-ı mezkûr mütevellîsi el-Hâc Salih b. Hüseyin hazır olduğu hâlde terâfu‘larında işbu yedi[m]de olan temessük mûcebince vakf-ı mezkûrun sâbıkā mütevellîsi olan İbrahim nâm kimesne bin yüz kırk sekiz senesi Zilka‘de’sinde menzil-i mezkûru Hadîce nâm hatun ferâğından bi’t-tevliye ve bi’l-icâreteyn bana îcâr ve tefvîz edip ben dahi ber-minvâl-i muharrer istîcâr ve tefevvüz edip hakk-ı müfevvazım oldukdan sonra târih-i i‘lâmdan yedi sene mukaddem diyâr-ı âhara gider olduğumda menzil-i mezkûrun beher şehr icâre-i müeccelesi olan yirmi beşer akçeyi taraf-ı vakfa edâ ve teslîme tarafımdan Doğramacı Mehmed nâm kimesneyi vekîl edip ol dahi altmış bir senesi Muharrem’ine değin bi’l-vekâle icâre-i mezkûreyi edâ etmiş iken mütevellî-i merkūm el-Hâc Salih Çelebi beni bilâ-veled fevt oldu deyü menzil-i mezkûru mâh-ı mezkûrda işbu mezbûr es-Seyyid İbrahim Çelebi’ye mahlûl olmak üzere bi’t-tevliye îcâr eylemiş el-hâletü hâzihî benim fevtim gayr-ı vâki‘ olmağla menzil-i mezkûru tasarrufuma istirdâd ederim deyü ba‘de’d-da‘vâ ve’s-suâl mezbûr es-Seyyid İbrahim Çelebi ber-minvâl-i muharrer menzil-i mezkûru mütevellî-i mezbûr altmış bir senesi Muharrem’inde bi’l-icâreteyn müste’cir olan Abdullah fevtiyle mahlûlünden yüz on guruş mu‘accele ve beher şehr yirmi beş akçe icâre ile bana bi’t-tevliye îcâr ve ben dahi istîcâr eyledim lâkin müste’cir-i evvel olup fevt oldu dedikleri işbu hazır olan Abdullah olduğu ma‘lûmum değildir dedikde merkūm Abdullah müdde‘âsını udûlden olan mahalle-i mezkûre imâmı Mustafa Efendi ve müezzini Ali Efendi ve el-Hâc İbrahim b. Abdurrahman şehâdetleriyle mezbûr es-Seyyid İbrahim Çelebi ve mütevellî-i mezbûr el-Hâc Salih muvâcehelerinde isbât etmeğin mûcebince menzil-i mezkûru merkūm Abdullah’a teslîme mezbû[r] es-Seyyid İbrahim Çelebi’ye tenbîh olunduğu huzûr-ı [âlîlerine] i‘lâm olundu. Fî-gurreti Recebi’l-ferd sene 1162