Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 240 Hüküm no: 241 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hasan Efendi’nin, vefat eden Meryem bt. Abdullah’da olan kira bedellerinin terekeden ödenmesi Ma‘rûz Mahmiye-i İstanbul’da Mollagürânî mahallesinde sâkine olup zâtı ta‘rîf-i şer‘î ile mu‘arrefe olan Hadîce bt. <> Hasan Efendi meclis-i şer‘-i şerîf-i enverde mahmiye-i mezbûrda Kazasker Mehmed Efendi mahallesinde sâkine iken bundan akdem vefât eden Meryem bt. Abdullah’ın bâ-hüccet-i şer‘iye vasîyy-i muhtârı olan İsmail Ağa b. el-Hâc Mehmed muvâcehesinde mukaddemâ müteveffât-ı mezkûre Meryem hayatında benim mahalle-i mezkûrede vâki‘ ma‘lûmü’l-hudûd menzilimde şehrî dörder guruş ücret ile sekiz ay müste’cirem olup müddet-i mezkûrede müctemi‘a olan otuz iki guruş hakkımı vermeyip zimmetinde kalmağla tereke-i vâfiye-i müteveffât-ı mezkûreden bana edâsıyla vasîyy-i mezbûra tenbîh taleb ederim deyü ba‘de’d-da‘vâ ve’l-inkâr müdde‘iye-i mezbûre Hadîce müdde‘âsını ahrâr-ı ricâl-i Müslimînden lede’t-tezkiye şehâdetleri makbûle olan Bostânî Ömer b. Ali ve Ahmed Ağa b. Mehmed nâm kimesneler şehâdetleriyle vasîyy-i mezbûr muvâcehesinde vech-i şer‘î üzere ba‘de’l-isbât ve’l-kabûl ve’t-tahlîfi’ş-şer‘î mûcebiyle meblağ-ı mezbûr otuz iki guruşu tereke-i vâfiye-i müteveffât-ı mezbûreden müdde‘iye-i mezbûreye edâ ve teslîm ile vasîyy-i mezbûra tenbîh olunduğu ba‘de’t-tescîl Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî-gurreti Recebi’l-ferd sene 1162