Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 241 Hüküm no: 242 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Mehmed’in, hanımı Ümmügülsüm bt. Hasan’a olan borcunu ödemesine yapılan tenbih Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Ümmügülsüm bt. Hasan meclis-i şer‘-i enverde derûn-ı arzuhâlde mezkûrü’l-ism zevci Hüseyin Ağa b. Mehmed muvâcehesinde mukaddemâ bin yüz altmış senesi şehr-i Rebî‘ülevvel’inin yirmi yedinci günü zevcim mezbûr Hüseyin Ağa malımdan ve yedimden yedi yüz elli guruş iktirâz ve ahz ve istihlâk edip ve meblağ-ı mezbûrun zimmetinde ber-vech-i muharrer bana deyni olduğunu huzûr-ı Müslimînde ikrâr ve yedime imzâ ve hâtemini hâvî temessük dahi vermişidi deyü mazmûnu takrîr-i meşrûhuna mutâbık bir kıt‘a temessük ibrâzıyla ba‘de’d-da‘vâ ve’s-suâl mezbûr Hüseyin Ağa cevâbında fi’l-vâki‘ zevcesi müdde‘iye-i mezbûreye zimmetinde yedi yüz elli guruş deyni olmak üzere ikrâr ve ber-vech-i muharrer temessük verdiğini ikrâr ve i‘tirâf edip lâkin ikrâr-ı mezkûrumda kâzib idim deyü olan da‘vâsında dahi müdde‘iye-i mezbûre Ümmügülsüm zevci mezbûr Hüseyin Ağa zevcem Ümmügülsüm Hatun’dan yedi yüz elli guruş iktirâz ve ahz eyledim deyü olan ikrârında kâzib olmadığına yemîn teklîf olundukda ol dahi half billâhi’l-aliyyü’l-a‘lâ etmeğin alâ-mûceb-i ikrârihî meblağ-ı mezkûr yedi yüz elli guruşu müdde‘iye-i mezbûre Ümmügülsüm Hatun’a edâ ve teslîm ile mezbûr Hüseyin Ağa tenbîh olunduğu huzûr-ı âlîlerine i‘lâm olundu. Fî-gurreti Recebi’l-ferd sene 1162