Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 243 Hüküm no: 245 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı Sava v. Dimitri’nin, Ekmekçi Mehmed Beşe b. Ahmed’e olan borcunu ödemesine dair yapılan tenbih Ma‘rûz Ekmekçi tâifesinden Mehmed Beşe b. Ahmed meclis-i şer‘-i enverde Muhzır es-Seyyid Mustafa mübâşeretiyle ihzâr-ı şer‘ olunan Sandalcı Sava v. Dimitri zimmî muvâcehesinde Yusuf Ağa b. Hüseyin nâm kimesne dahi hazır olduğu hâlde mukaddemâ işbu merkūm Sandalcı Sava zimmî hâzır-ı mezbûr Yusuf Ağa ile herbiri âharın zimmetine lâzım gelen meblağa kefîl olup malımdan ve yedimden yüz doksan guruş iktirâz ve ahz ve istihlâk edip ve meblağ-ı mezbûr ber-vech-i muharrer zimmetlerinde bana deynleri olduğunu târih-i i‘lâm senesi Cumâdelûlâ’sının yirminci günü alâ-re’si’l-işhâd ikrâr ve yedime imzâ ve hâtemlerini hâvî temessük dahi vermişleridi deyü mazmûnu takrîr-i meşrûhuna mutâbık bir kıt‘a temessük ibrâz ile ba‘de’d-da‘vâ ve’s-suâl hâzır-ı mezbûr Yusuf Ağa kazıyye minvâl-i muharrer üzere olduğunu ikrâr edip lâkin merkūm Sava zimmî ancak elli guruş ahzlarını ve elli guruşdan mezbûr Yusuf Ağa’nın sehmine kefâleti ikrâr ber-mantûk-ı temessük ma‘an ziyâde ahzlarını ve ziyâde deyninden mezbûr Yusuf Ağa’nın sehmine kefâletini inkâr etmeğin müdde‘î-i mezbûr müdde‘âsını ahrâr-ı ricâl-i ehl-i zimmetden ve ekmekçi tâifesinden Boğdan v. Mitro ve Karaca v. Tana nâm zimmîler şehâdetleriyle merkūm Sava zimmî muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup ber-mûceb-i asâlet ve kefâlet meblağ-ı mezkûr yüz doksan guruşu müdde‘î-i mezbûr Mehmed Beşe’ye edâ ve teslîmle merkūm Sava zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 4 min-Recebi’l-ferd sene 1162