Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 244 Hüküm no: 247 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David, Vartan ve Serkiz’in yasak olduğu halde kaldıkları han odalarına mengene koyup mensucat perdaht etmekten menedildikleri Bâ-mühr-i hazret-i efendi Ma‘rûz Resm-i tamga-yı akmişe-i İstanbul mukāta‘ası mülhakātından Mahmud Paşa Câmi‘-i şerîfi kurbünde mîrî tamgahânede vâki‘ üç aded ateş mengenelerine hatt-ı hümâyûn-ı şevket-makrûn ile mu‘anven berat-ı âlîşân ile ber-vech-i maktû‘ mutasarrıf olan Ahmed Ağa ve Mustafa Ağa kulları meclis-i şer‘de Çukacılar hanı sükkânından David v. Avram ve Hazînedâr hanı sükkânından Vartan v. Ohan ve Serkiz v. Kirkor nâm zimmîler muvâcehelerinde mutasarrıf olduğumuz üç aded mengeneden kutnî ve yeşimî ve sâir mensûcât-ı harîriyeye mahsûs bir aded mengeneden mâ‘adâ dîbâ ve atma ve çekme ve şerid ve şâl ve şâliyân ve sâir ateş ile perdaht olunur emti‘a-i mütenevvi‘a için iki aded mengene mu‘ayyen olup ateş ile perdahta muhtâc olan emti‘a-i mütenevvi‘a şürût-ı berat-ı âlîşânda tasrîh ve ta‘yîn olunan ücretden ziyâde taleb olunmamak üzere bi’l-cümle mîrî mengenelerde perdaht olunup mîrî mengeneden mâ‘adâ gayri mahallerde mengene ihdâsı ve emti‘a perdahtı külliyyen memnû‘ ve bu makūle ateş ile perdaht eder muhdes mengeneler kebîr ve i‘mâlden men‘ olunmak üzere tuğrâ-yı garrâ ile mu‘anven yedimize kat‘î emr-i âlîşân dahi ihsân olunmuşiken işbu mesfûrlar hilâf-ı emr-i âlîşân mütemekkin oldukları hanlarda muhdes mengene peydâ ve Ankara şâlîsi örselenmesini ve sâir mensûcâtı ateş ile perdaht ederler şürût-ı berat-ı âlîşân ve yedimize i‘tâ buyrulan işbu emr-i celîlü’ş-şân mûcebince kıbel-i şer‘den mesfûrûn men‘ ve tenbîh-i ekîd olunmak matlûbumuzdur deyü min-külli’l-vücûh takrîrlerine mutâbık bir kıt‘a emr-i âlîşân ibrâz eylediklerinde gıbbe’s-suâl fi’l-hakīka mersûm David Yahûdî ve mesfûrân Vartan ve Serkiz zimmîler mütemekkin oldukları hanlarda odalarında mengene peydâ ve ateş ile ber-minvâl-i muharrer envâ‘-ı emti‘a perdaht eylediklerini herbiri ikrâr ve i‘tirâf etmeğin emr-i âlîşân muvâcehelerinde kırâet ve mazmûn-ı münîfi üzere bu makūle ateş ile perdahtdan men‘ ve tenbîh-i ekîd olundukda onlar dahi herbiri sem‘an ve tâ‘aten deyüp fîmâ-ba‘d odalarında mengeneleri ref‘ ve ateş perdahtını kat‘a etmemek üzere müteahhid oldukları ba‘de’t-tescîl huzûr-ı âlîlerine i‘lâm olundu. Fî 5 Recebi’l-ferd sene 1162