Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 51 Hüküm no: 12 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amid’in kuyumcu esnafı şeyhinin vefatıyla yerine Seyyid Ali b. Seyyid Mehmed Said ve Seyyid Ahmed b. Yakub’un şeyhlik talepleri Ma‘rûz, Âmid kazâsında vâki‘ kuyumcu esnâfının bâ-berât-ı âlîşân şeyhi olan es-Seyyid Ahmed bundan akdem bilâ-veled fevt oldukda mahlûlünden es-Seyyid Ali b. es-Seyyid Mehmed Said ve es-Seyyid Ahmed b. Yakub’a kendi arzuhâlleri ve sadr-ı Anadolu-yı esbak i‘lâmıyla bâ-fermân-ı âlîşân tevcîh olunup el-yevm iştirâken üzerlerinde olduğu askerî rûznâmçesinden derkenâr olunmağla me’mû[l]-i arzuhâl ve derkenâra nazar ve bi’t-tahkīk iktizâsı i‘lâm olunmak bâbında sâdır olan fermân-ı âlîşâna imtisâlen kazâ-yı mezbûr ahâlîsinden Der-aliyye’de bulunan bî-garaz erbâb-ı vukūfdan Topuzoğlu el-Hâc Mehmed b. el-Hâc Ali ve İnce Ağaoğlu Yusuf b. İsmail ve Kürdoğlu Hüseyin b. İsa nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzuhâlde tahrîr ve inhâ kılındığı üzere şeyhlik-i mezkûra mutasarrıflar olan sahib-i arzuhâl merkūmân es-Seyyid Ali ve es-Seyyid Ahmed olup el-yevm hayatda olduklarını ve yedlerinde olan beratları kazâen zâyi‘ olmuş olduğunu herbiri alâ-tarîkı’ş-şehâde ihbâr etmeleriyle bu makūle şeyhlik ve ahi baba ve kethudâ ve yiğitbaşı ve sâir esnâf zâbitliği muhtâr-ı esnâf olmak Der-aliyye ve sâir cemî‘ memâlik-i mahrûsede cârî olan nizâm-ı mer‘iyyeden olduğuna nazaran bi’l-i‘lâm muhtâr-ı esnâf olmayan kimesneye kasr-ı yedlerine amel ve i‘tibâr olunmamak şartıyla ber-vech-i istid‘â kaydı mûcebince zâyi‘den berat i‘tâsı mutlaka irâde-i seniyyeye menût idiği huzûr-ı âlîlerine i‘lâm olundu. [Fî] 7 M sene [12]48