Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 51 Hüküm no: 13 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaağaç Gölhisarı kazasındaki Yassıöyük köyü camiinin hitabet cihetinin Ahmed Halîfe’ye tevcihi Ma‘rûz, Karaağaç Gölhisar kazâsına tâbi‘ Yassıöyük nâm karyede vâki‘ câmi‘-i şerîfin vazîfe-i mu‘ayyene ile hitâbet ciheti Ömer b. Mustafa’nın üzerinde olduğu askerî rûznâmçesinden derkenâr olunmağla meâl-i arz ve derkenâra nazaran iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Mustafa b. İbrahim ve Halil b. Halil nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere mezbûr Ömer’in bilâ-veled fevti vâki‘ ve dârende-i arz merkūm Ahmed Halîfe’nin mahâllinde meclis-i şer‘îde bi’l-imtihân ehliyet ve istihkākı zâhir ve muhtâr-ı cemâ‘at olduğunu herbiri alâ-tarîkı’ş-şehâde ihbâr etmeleriyle bu sûretde cihet-i mezkûre müteveffâ-yı mezbûrun mahlûlünden mezbûr Ahmed Halîfe’ye tevcîh olunmak bâbında emr [ü] fermân hazret-i veliyyü’l-emrindir. Fî 12 M sene [12]48