Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 245 Hüküm no: 250 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Froster bt. Tanaş’ın tasarrufundaki yirmi yedi adet bekâr odalarını tamir ettireceğinden odalarda kalan kiracıların odalardan çıkmaları için yapılan tenbih Bâ-mühr-i hazret-i efendi Ma‘rûz Derûn-ı arzuhâlde mezkûr husûs mahâllinde istimâ‘a muhtâc olmağla sâdır olan fermân-ı âlîlerine ve bi’t-taleb cânib-i [şer‘-i] enverden ta‘yîn olunan Başkâtib Mevlânâ Ömer Efendi dâ‘îleri mübâşiri Erzurumî Bostânî Ali Haseki kullarıyla derûn-ı arzuhâlde mezkûr Ayakapısı hâricinde vâki‘ bir tarafdan Davud Ağa hanı ve bir tarafdan Kostantin nâm hâlik veresesi menzilleri ve bir tarafdan leb-i deryâ ve bir tarafdan tarîk-ı âm ile mahdûd fevkānî ve tahtânî yirmi yedi aded bekâr odalarını ve müştemilât-ı ma‘lûmeyi hâvî bir bâb menzil üzerine varıp huzûr-ı Müslimînde akd-i meclis-i şer‘-i âlî eyledikde odalar mezkûrların bi’l-icâreteyn mutasarrıfesi sahibe-i arzuhâl Froster bt. Tanaş v. İstati zimmiye tarafından husûs-ı âti’z-zikre vekîli olduğu şahs-ı merkūmeyi ârifân Antonaki v. Yorgi ve Yakomi v. Yorgi zimmîler şehâdetleriyle sâbit olan Simyon v. Yorgaki zimmî bi’l-vekâle meclis-i ma‘kūd-ı mezkûrda odalar-ı mezkûrelerde icâre-i ma‘lûme ile müşâhereten müste’cirler olan Odabaşı Anton v. Yorgi ve Aleksi v. Dimitri ve Yani v. Pandeli ve Yani v. Apostol ve Anton v. Yorgi ve Yani v. Dimo ve Mihal v. Kostantin ve Dimitri v. Çise ve Yorgaki v. Dimo ve David ve Panayot ve Lambor Lozengin? ve Manol ve diğer Manol ve Uzun Tanaş ve Sıvacı Şeder ve Mihal ve sâirleri muvâcehelerinde merkūmûn zimmîler icâre-i ma‘lûme ile işbu odalarda müvekkilem merkūmenin müşâhereten müste’cirleri olup ancak odalar-ı mezkûreler harâba müşrif olmağla ta‘mîri’çün müste’cirûn-ı mezkûrûn ile târih-i i‘lâm şehrinden bir gün mukaddem fesh-i icâre etmekle hâlâ mesfûrûna suâl odalar-ı mezkûrelerden hurûc ve tahliye ve müvekkilem merkūmeye teslîmlerine tenbîh olunmasını bi’l-vekâle taleb ederim deyü ba‘de’d-da‘vâ ve’s-suâl müste’cirûn-ı merkūmûn zimmîler cevâblarında kazıyye minvâl-i muharrer üzere olduğunu herbiri ikrâr ve i‘tirâf etmeğin alâ-mûceb-i i‘tirâfihim zikrolunan odalardan hurûc ve tahliye ve müvekkile-i mesfûreye red ve teslîmleriyle zimmiyûn-ı müste’cirûn-ı mesfûrûna tenbîh eylediğini mevlânâ-yı mezbûr mahâllinde ketb ü tahrîr ve ma‘an ba‘s olunan ümenâ-i şer‘-i enver ile gelip alâ-vukū‘ihî meclis-i şer‘-i şerîfe inhâ ve takrîr eyledikde ba‘de’t-tenfîz huzûr-ı âlîlerine i‘lâm olundu. Fî 7 Receb sene 1162