Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 246 Hüküm no: 251 Orijinal metin no: [33b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizama aykırı hareketleri olan Koğacı esnafından Hacı Ahmed b. İbrahim’in esnaflıktan menedildiği Ma‘rûz Koğacılar esnâfının kethudâları el-Hâc Hüseyin b. Veli ve yiğitbaşıları Mustafa Çelebi b. İsmail ve ustalardan Hacı Mustafa b. Ali ve Hasan Ağa b. Ali ve İsmail Çelebi b. Hasan ve Mehmed Çelebi b. Hüseyin ve Mehmed b. Ömer ve Mustafa b. Abdullah ve Hacı Ahmed Ağa b. Hacı Mustafa ve Halil b. İbrahim ve Mehmed b. Hasan ve İbrahim b. Ali ve Mehmed b. Hasan ve Mehmed b. Hacı Mustafa ve Hacı Süleyman b. Ahmed ve Mehmed b. Mustafa meclis-i şer‘-i enverde Mumcu Ali Beşe mübâşeretiyle ihzâr-ı şer‘ ettirdikleri el-Hâc Ahmed b. İbrahim muvâcehesinde mezbûr el-Hâc Ahmed esnâfımız ustalarından olup lâkin öteden beri kendi hâlinde olmayıp kadîmî nizâmımıza mugāyir umûrlara sa‘y edip esnâfımız ustaları beynlerine ihtilâl ve[r]ir olmağla mezbûrdan kat‘ā emn ü râhatımız yokdur deyü teşekkî ve mezbûr el-Hâc Ahmed’in salâhı zâhir olunca san‘at-ı mezkûreyi işlemekden men‘le ta‘zîr olunmasını iltimâs eylediklerinde mezbûr el-Hâc Ahmed dahi fîmâ-ba‘d san‘at-ı mezkûreyi işlememeğe ta‘ahhüd edip ol vechile kat‘-ı nizâ‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 8 min-Recebi’l-ferd sene 1162