Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 247 Hüküm no: 253 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafından Aslan, Sünbül ve İskender’in yasak olan mahallerde sabun satmaktan menedildikleri Ma‘rûz Sabuncu esnâfının kethudâsı Mehmed Çelebi b. Hasan ve yiğitbaşıları diğer Mehmed Çelebi b. Hasan ve ustalardan Mustafa Çelebi b. Ali ve Mehmed Çelebi b. İbrahim ve Bekdaş Beşe b. Mustafa ve es-Seyyid el-Hâc İbrahim ile Kostantin v. Dimitri ve Yuvan v. Sava ve Marko v. Petro ve Minnet v. David ve Borotomoz v. Melah zimmîler meclis-i şer‘-i enverde sabuncu tâifesinin küfe ile gezdirip esvâk ve mahallâtda sabun satıcıları tâifesinden Mumcu Mehmed Beşe mübâşeretiyle ihzâr-ı şer‘ olunan Aslan v. Toma ve Sünbül v. Kaytan ve İskender v. Sava zimmîler muvâcehelerinde öteden beri işbu küfe ile sabun satıcılar Zindânkapısı’ndan yemîn ve yesârında Balıkpazarıkapısı’na ve Unkapanıkapısı’na varınca dâhil-i sûr ve hâric-i sûrda ve yine Zindânkapısı’ndan Mercan sûkuna varınca tarîk-ı âm üzerine ve köşebaşlarına sabun küfelerini vaz‘ ile satmakdan fermân-ı âlî ile memnû‘lar olup ve satmamak üzere tâife-i merkūmûna kirâren ve mirâren tenbîh olunmuşiken işbu merkūmûn Aslan ve Sünbül ve İskender mütenebbihler olmayıp hâlâ Zindânkapısı hâricinde tarîk-ı âm üzerine vaz‘-ı küfe ile sabun bey‘ ederler deyü teşekkî ve merkūmûnun men‘lerini taleb ederiz deyü olan da‘vâlarında merkūmûn Aslan ve Sünbül ve İskender zimmîler zikrolunan mahallerde bey‘den memnû‘lar olduklarını ikrâr lâkin sabun bey‘lerini inkâr eylediklerinden mâ‘adâ tâ‘aten li’l-emri’l-âlî fîmâ-ba‘d dahi mahâll-i mezkûrlarda sabun satmamağa ta‘ahhüd edip ol vechile kat‘-ı nizâ‘ ettikleri Bâb’dan huzûr-ı âlîlerine i‘lâm olundu. Fî 9 Recebi’l-ferd sene 1162