Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 76 Hüküm no: 73 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Abraham’ın terekesinin taksiminde ortaya çıkan anlaşmazlığın giderildiği Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin iken bundan akdem hâlik olan Abraham v. Karabet zimmînin verâseti zevce-i metrûkesi Sara bt. Karabet Nasrâniye ile li-ebeveyn ammisi oğlunun oğlu Bedros v. Sirop zimmîye münhasıra [olduktan sonra] terekesinin rub‘u zevcesi mesfûre Sara’ya ve selâse-i erbâ‘ı merkūm Bedros’a isâbeti ba‘de’t-tahakkukı’ş-şer‘î işbu râfi‘ü’r-rakīm merkūm Bedros zimmî meclis-i şer‘-i hatîr-i lâzimü’t-tevkīrde zâtı zeyl-i vesîkada muharrerü’l-esâmi Müslimîn ta‘rîfleriyle mu‘arrefe olan zevce-i mesfûre Sara Nasrâniye muvâcehesinde üzerine da‘vâ ve takrîr-i kelâm edüp mûrisim hâlik-i mesfûr Abraham nâm zimmînin emlâkından olup kasaba-i mezbûre hâricinde ze‘âmet toprağı demekle ma‘rûf Bozlar nâm mahâlle karîb mevzi‘de vâki‘ bir tarafı Değirmenci Kirkor zimmî bağı ve bir tarafı Eskarlini zimmî bağı ve bir tarafı benim bağım ve bir tarafı tarîk-i hâs ile mahdûd tahmînen yedi dönüm mikdârı çavuş üzümü ve dut üzümünü müştemil bir kıt‘a kürûmî mülk bağını mesfûr Abraham helâkinden altı gün mukaddem hasta ve sâhib-i firâş olup hâl-i marazında tasarrufâtı nâfize olmadığı hâlde zevcesi mezbûreye üç yüz guruş deyni mukābelesinde bey‘ edüp ve ol hastalıkdan firâşından kalmadan [kalkmadan] altıncı günü hâlik olmuş iken mezbûre Sara dahi mülk-i müşterâsı olmak zu‘muyla bağ-ı mezkûra bi-gayrı hakkın vaz‘-ı yed eder bey‘-i mezkûrun adem-i sıhhatine binâen suâl olunup tashîh-i merkūm üzere bağ-ı mezkûrun selâse-i erbâ‘ından kasr-ı yed ve bana teslîme tenbîh olunmak matlûbumdur dedikde gıbbe’s-suâl merkūme Sara cevâbında fi’l-hakīka zevcim hâlik-i mesfûr Abraham hasta iken ve sâhib-i firâş iken bağ-ı mezkûru deyni mukābelesinde bana bey‘ edüp ve hastalık firâşından kalmadın [kalkmadan] altıncı günü hâlik oldu deyü bey‘-i mezkûr maraz sadedinde olduğunu ikrâr u i‘tirâf etmekle alâ-mûcib-i ikrârihâ bağ-ı mezkûrun selâse-i erbâ‘ından kasr-ı yed ve merkūm Bedros’a teslîme tenbîh birle mâ-hüve’l-vâki‘ bi’t-taleb ketb olundu. Tahrîren fi’l-yevmi’l-âşir min-Zilka‘deti’ş-şerîfe li-sene tis‘a ve seb‘în ve mi’ete ve elf. Şuhûdü’l-hâl: Kayseriyeli Mehmed Ağa, el-Hâc Mahmud Ağa, Ahmed Ağa b. Veli, Şehir Kethüdâsı Ahmed Beşe, Ahmed Efendi. Yazıcı Kirkor, Ohan v. Marat, Papas Kevork, Aci Mikail, Kazgancıoğlu Bogos, Dülger Haçador, Zafiri v. Yani, Maksud v. Yani.