Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 253 Hüküm no: 263 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Mansur ile hanımı Zeyneb bt. Abdullah’ın, Osman b. Abdullah’dan satın aldıkları evin Hanife bt. Mehmed’e ait olduğu tespit edildiğinden ödedikleri paranın kendilerine iadesine yapılan tenbih Ma‘rûz İstanbul’da Yenibahçe kurbünde Mi‘mâr Sinan mahallesi ahâlîsinden Mustafa Beşe b. Mansur ile zevcesi Zeyneb bt. Abdullah Mahkeme-i Bâb’da meclis-i şer‘de Osman b. Abdullah muvâcehesinde târih-i i‘lâmdan iki sene mukaddem mezbûr Osman yedinde mevrûs mülk ve hakkı olmak üzere mahalle-i mezbûrede vâki‘ bir tarafdan Bayrakdâr el-Hâc Ali menzili ve bir tarafdan Berber Mustafa menzili ve bir tarafdan ba‘zen Şerife Hatun ve ba‘zen Hâcce Hatun menzilleri ve bir tarafdan tarîk-ı âm ile mahdûd ma‘lûmü’l-müştemilât bir bâb menzilini bey‘-ı bât-ı sahîh-i şer‘î ile işbu bir kıt‘a mübâya‘a hücceti nâtık olduğu üzere ale’l-iştirâki’s-seviy yüz on guruşa bize bey‘ ve temlîk ve teslîm biz dahi ber-vech-i muharrer iştirâ ve temellük ve tesellüm ve kabûl edip semeni olan meblağ-ı mezbûr yüz on guruşu mezbûr Osman’a tamamen edâ ve teslîm ol dahi ba‘de’l-ahz ve’l-kabz ber-vech-i muharrer mülk-i müşterâmız iken târih-i i‘lâmdan altmış gün mukaddem gāibetü ani’l-meclis Hanife bt. Mehmed nâm hatun ceddi merhûm Kurd’un evlâdından olduğunu mezbûre Hanife Hatun meclis-i şer‘de bizim ile mezbûr Osman muvâcehesinde vech-i şer‘î üzere ba‘de’l-isbât ber-vech-i muharrer vakfiyetine hükmolundukdan sonra menzil-i mahdûd-ı mezkûru mezbûre Hanife Hatun yedimizden ahz u kabz etmekle hâlâ mezbûr Osman’a semen deyü medfû‘umuz olan yüz on guruşu mezbûr Osman’dan taleb ederiz deyü herbiri da‘vâ ettikde mezbûr Osman dahi ber-vech-i muharrer ikrâr ve i‘tirâf etmeğin mûcebiyle meblağ-ı mezbûr yüz on guruşu müdde‘iyân-ı mezbûrân Mustafa Beşe ve Zeyneb Hatun’a edâ ve teslîme mezbûr Osman’a tenbîh olunduğu huzûr-ı âlîlerine i‘lâm olundu. Fî 14 Recebi’l-ferd sene 1162