Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 257 Hüküm no: 271 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Odabaşı b. Feyzullah’ın, bazı eşya bedelinden alacak iddiasıyla Mehmed b. İbrahim’e açtığı davayı ispat edemediği Ma‘rûz Sahib-i arzuhâl Mehmed Odabaşı b. Feyzullah Mahkeme-i Bâb’da meclis-i şer‘de derûn-ı arzuhâlde mastûrü’l-ism olup Başkullukçu İbrahim Beşe mübâşeretiyle ihzâr olunan Mehmed b. İbrahim mahzarında târih-i i‘lâmdan elli gün mukaddem Bitpazarı’nda sâkin olduğumuz dükkânda eşyâ-i memlûkemden iki kırmızı neftî cedîd çuka binişi onar guruşa ve bir fıstıkī çuka cebeyi beş buçuk guruşa ve bir hizânî? çuka cebeyi altı guruşa ki cem‘an otuz bir buçuk guruşa mezbûr Mehmed’e bey‘ ve teslîm ol dahi ber-vech-i muharrer iştirâ ve tesellüm etmekle semen-i mecmû‘-ı mezkûr otuz bir buçuk guruşu mezbûr Mehmed’den taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını beyâna kādir olmamağla mezbûr Mehmed bi’t-taleb tahlîf olunmağın mûcebiyle müdde‘î-i mezbûr Mehmed Odabaşı bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 15 min-Recebi’l-ferd sene 1162