Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 259 Hüküm no: 274 Orijinal metin no: [36a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melkon v. Gaspar’ın Ekmekçi Asvador v. Arotin’e olan borcunu ödemesine yapılan tenbih Ma‘rûz Ekmekçi tâifesinden Asvador v. Arotin meclis-i şer‘-i enverde Mumcu İbrahim Beşe mübâşeretiyle ihzâr-ı şer‘ olunan Melkon v. Gaspar zimmî muvâcehesinde târih-i i‘lâmdan on beş gün mukaddem mesfûr Melkon zimmî malımdan ve yedimden iki yüz on guruş on para iktirâz ve ahz ve istihlâk edip ve meblağ-ı mezkûr zimmetinde bana deyni olduğunu alâ-re’si’l-işhâd ve ikrâr ve işhâd dahi etmeğin hâlâ meblağ-ı mezkûr iki yüz on guruş on parayı taleb ederim deyü ba‘de’d-da‘vâ ve’l-inkâr müdde‘î-i mesfûr müdde‘âsını ahrâr-ı ricâl-i Müslimînden es-Seyyid Nu‘man Çelebi b. Halil ile ahrâr-ı ricâl-i ehl-i zimmetden Sarrâf Mihail v. Sorab zimmî şehâdetleriyle merkūm Melkon zimmî muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup meblağ-ı mezbûr iki yüz on guruş on parayı müdde‘î-i mesfûra edâ ve teslîmle merkūm Melkon zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 15 Recebi’l-ferd sene 1162