Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 260 Hüküm no: 277 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesinden Abdullah Efendi’nin evini bekâr kimselere kiraya vermekten menedildiği Ma‘rûz İstanbul’da merhûm Sultan Mehmed Han Câmi‘-i şerîfi kurbünde Kirmasti mahallesi imâmı el-Hâc Mehmed Efendi ve müezzini Yahya Efendi ve ahâlîsinden Ali Efendi b. Mehmed ve Ahmed b. Abdülbaki ve el-Hâc Mustafa Ağa b. Ramazan Kapudan ve el-Hâc Ali b. Ahmed ve Mustafa Çelebi b. Halil ve el-Hâc Mehmed b. Ahmed ve Ahmed Efendi b. Musa ve Abdülbaki b. İsmail nâm kimesneler Mahkeme-i Bâb’da meclis-i şer‘de mahalle-i mezbûre ahâlîsinden olup derûn-ı arzuhâlde mezkûrü’l-ism Abdullah Efendi mahzarında mezbûr Abdullah Efendi’nin mahalle-i mezbûrede vâki‘ ma‘lûmü’l-hudûd tasarrufunda olan bir bâb menzilini bundan akdem sâdır olan fermân-ı âlîşâna mugāyir mücerred kimesnelere îcâr etmek âdet-i müstemirresi olup hâlâ mücerred olan Fazlullah Ağa nâm kimesneye menzil-i mezkûru îcâr etmekle bir vechile emniyetimiz yokdur deyü herbiri ba‘de’t-teşekkî mezbûr Abdullah Efendi dahi ber-vech-i muharrer ikrâr eylediğinden sonra müste’cir-i mezbûr Fazlullah Ağa’yı ihrâc edip ba‘de’l-yevm menzil-i mezkûrunu mücerred kimesnelere îcâr etmeyip mahalle-i mezbûre imâmı ma‘rifetiyle müteehhil kimesnelere îcâr etmek üzere ta‘ahhüd eylediği huzûr-ı âlîlerine i‘lâm olundu. Fî 16 Recebi’l-ferd sene 1162