Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 53 Hüküm no: 15 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokat’ın Yağıbasan Medresesi Evkafı su yolları ve kuyularının temizlenmesi cihetinin Hüseyin’e tevcihi Ma‘rûz, Tokat kazâsında vâki‘ Yağıbasan Medresesi Evkāfı’nın senevî bir müd hınta ile çehgânlık ciheti Ahmed Halîfe’nin üzerinde olduğu askerî rûznâmçesinden derkenâr olunmağla iktizâsı i‘lâm olunmak bâbında sâdır olan fermân-ı âlîşâna imtisâlen bu esnâda Der-aliyye’ye gelen bî-garaz erbâb-ı vukūfdan kazâ-i mezbûrda Çay mahallesi ahâlîsinden Beyoğlu Hüseyin b. Mustafa ve Seyyid Necmeddin mahallesi ahâlîsinden Etemoğlu es-Seyyid Ahmed b. Ali nâm kimesneler meclis-i şer‘-i şerîfe celb ile keyfiyeti gereği gibi etrâfıyla suâl olundukda vakf-ı mezkûr çehgânı olanlar medrese-i mezbûrenin kuyu ve suyollarını dâimâ tefrîğ ve ıslâh ve harâb olan kanevât ve mahâll-i sâiresini dahi i‘mâr edeceğine binâen mezbûr Ahmed’in hîn-i fevtinde yerine bu san‘atda mahâreti olan bir kimesnenin nasbı lâzım geldiğinden nâib-i mûmâ-ileyh erbâbını ahâlîden lede’s-suâl dârende-i arz merkūm Hüseyin’in san‘at-ı mezkûrda mahâret-i tâmmesi olup hizmet-i mezkûreye her vechile ehil ve elyak olduğunu ahâlî-i memleket mahâllinde huzûr-ı şer‘a inhâ eylediler ve fi’l-hakīka ehliyeti bizim dahi ma‘lûmumuzdur deyü mazmûn-ı arzı tasdîk ve alâ-vefki’ş-şehâde ihbâr etmeleriyle bu sûretde çehgânlık-ı mezkûr müteveffâ-yı mezbûrun bilâ-veled mahlûlünden merkūm Hüseyin’e tevcîh olunmak bâbında emr [ü] fermân. [Fî] 14 M sene [12]48