Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 263 Hüküm no: 282 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Tuzcu Mustafa Beşe b. Yusuf’un dükkânındaki eşyalarının tespit edilip kayyım tayin edilen Tuzcular kethudası Ahmed Çelebi’ye teslim edildiği Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan Mevlânâ Feyzullah Efendi Bakkāllar Pazarbaşısı el-Hâc Mehmed Ağa ve sâir mazbûtü’l-esâmî bölükbaşıları ve Tuzcular Kethudâsı Ahmed Çelebi ve sâir tuzcular ustaları ile sahib-i arzuhâl Hasan Beşe’nin İstanbul’da Zindânkapısı hâricinde Tuzcular sûkunda vâki‘ tuzcu dükkânına varıp dükkân-ı mezbûrun müste’ciri olup gaybet-i münkatı‘a ile gāib olan Mustafa Beşe b. Yusuf dükkân-ı mezbûru mukaffel bırakıp firâr eylediği müte‘ayyin olmağla dükkân-ı mezbûru feth ve derûnunda mevcûd olan eşyâsını pazarbaşı-i mezbûr ve sâirleri ma‘rifetleriyle tahrîr ve mîrî kantar ile vezn olundukda bin dört yüz doksan yedi vakıyye tuzu ve dört yüz yetmiş üç vakıyye döğülmüş tuz ve üç keyl-i Kefe ve bir değirmen ve bir terâzî ve yirmi bir denk Kastamonu urganı mevcûd olup eşyâ-i muharrere-i mezkûreyi gāib-i mezbûrun hâli mütebeyyin olunca emîn [ve] müstakīm idiği pazarbaşı-i mezbûr el-Hâc Mehmed ve sâir bölükbaşılar ihbârlarıyla müte‘ayyin olan tuzcular kethudâsı mezbûr Ahmed Çelebi b. Ali nâm kimesneyi kayyım nasb ve ta‘yîn ve eşyâ-i muharrere-i mezkûreyi kayyım-ı mezbûra teslîm eylediğini mevlânâ-yı mezbûr mahâllinde ba‘de’t-tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri huzûr-ı âlîlerine i‘lâm olundu el-emrü li-men-lehu’l-emr. Fî 18 Recebi’l-ferd sene 1162