Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 263 Hüküm no: 283 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilarî Hüseyin ve İsmail b. Ali’nin, ortak olup yeniden inşa ettikleri evlerinin nizama uygun olduğunun tescil edildiği Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘den bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri hâssa mi‘mârlarından el-Hâc Süleyman Halîfe ile mahmiye-i İstanbul’da Kâtib Sinan mahallesinde yine merhûm Kâtib Sinan Vakfı’ndan sahib-i arzuhâl Kilârî Hüseyin ve İsmail b. Ali’nin iştirâken tasarrufunda mahâll-i nizâ‘ olan menzillerine varıp cerîdede mastûrü’l-esâmî Müslimîn ile vakf-ı mezbûr mütevellîsi vekîli Hüseyin Çelebi hazır olduğu hâlde mezbûrânın câr-ı mülâsıkı ve hasımları derûnda mezkûrü’l-ism Hüseyin Ağa’nın etbâ‘ından İbrahim Çelebi b. Mehmed muvâcehesinde tecdîde şürû‘ olunan menzil-i mezbûrun irtifâ‘ına ba‘de’n-nazar mi‘mâr-ı mezbûr ihbârıyla ancak sekiz zirâ‘ idiği mütehakkık ve kānûn-ı pâdişâhî on iki zirâ‘a dek müsâ‘id olmağın mûcebiyle mezbûrâna ber-minvâl-i muharrer itmâm-ı binâya izin verilip hasımları tarafından vechen mine’l-vücûh mu‘âraza iktizâ etmediğini mevlânâ-yı mezbûr mahâllinde keşf ve tahrîr ve ma‘an ba‘s olunan ümenâ-yı şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 20 min-Recebi’l-ferd sene 1162