Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 264 Hüküm no: 285 Orijinal metin no: [37a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in, Mismarcı Aslan’a mismâr bedelinden olan borcunu ödemesine yapılan tenbih Ma‘rûz Mismârcı tâifesinden sahib-i arzuhâl Aslan zimmî meclis-i şer‘-i hatîrde derûn-ı arzuhâlde mezkûrü’l-ism el-Hâc Hüseyin mahzarında târih-i i‘lâmdan iki buçuk sene mukaddem mezbûr el-Hâc Hüseyin yedimden iştirâ ve kabz eylediği ber-mûceb-i temessük mismâr semeninden bâkī yetmiş altı guruş on para hakkım olmağla meblağ-ı bâkī-i mezkûru mezbûr el-Hâc Hüseyin’den taleb ederim deyü da‘vâ eyledikde ol dahi cihet-i mezkûreden müdde‘î-i mesfûra ol mikdâr guruş deyni olduğunu ikrâr ve i‘tirâf etmeğin alâ-mûceb-i i‘tirâfihî meblağ-ı bâkī-i mezkûr yetmiş altı guruş on parayı müdde‘î-i mesfûr Aslan zimmîye edâ ve teslîme mezbûr el-Hâc Hüseyin’e tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 21 min-Recebi’l-ferd sene 1162