Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 265 Hüküm no: 286 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kiryako’nun, Bakkal İstori’ye satıp parasını aldığı bakkal malzemelerinin kârından da hisse talebiyle açtığı davanın reddedildiği Ma‘rûz Bakkāl tâifesinden sahib-i arzuhâl Kiryako v. Vendi zimmî meclis-i şer‘-i enverde yine tâife-i mezbûreden Mumcu Halil Beşe mübâşeretiyle ihzâr-ı şer‘ olunan İstori v. Sahak zimmî muvâcehesinde târih-i i‘lâmdan on bir ay mukaddem benim İstanbul’da Çukurçeşme’de vâki‘ ma‘lûmü’l-hudû[d] taht-ı icâremde olan bakkāl dükkânındaki bakkāllık emti‘amı yirmi üç bin yüz on altı akçe semen tesmiyesiyle merkūm İstori’ye bey‘ ve teslîm ol dahi yedimden iştirâ ve kabz edip dükkân-ı mezkûrda emti‘a-i mezkûre ile yedi ay ba‘de’l-i‘mâl ve’t-ticâre semen-i mezkûr olan meblağ-ı mezkûr yirmi üç bin yüz on altı akçeyi bana tamamen edâ ben dahi yedinden ahz u kabz edip ancak merkūm İstori müddet-i mezkûrede emti‘a-i mezkûreyi i‘mâl ile on yedi bin akçe nemâ hâsıl edip ve kendinin emti‘a-i mezkûreden gayri âhar malı dahi olmayıp ancak benim bey‘ eylediğim emti‘anın nemâsı olmağla meblağ-ı mezkûr on yedi bin akçeyi merkūm İstori zimmîden taleb ederim deyü olan da‘vâsı takrîr-i meşrûhu üzere sahîha olmamağla hasmı merkūm İstori zimmîye şer‘an suâl teveccüh dahi etmeyip müdde‘î-i mezbûr bî-vech-i şer‘î mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 21 min-Recebi’l-ferd sene 1162