Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 265 Hüküm no: 287 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in, Rukiye bt. Hüseyin’e sattığı evi Rukiye’nin başkasına aldığı fiyattan fazla bedel ile sattığından aradaki farkın kendisine ödenmesi talebinin hukuksuz bulunduğundan reddedildiği Ma‘rûz Mahmiye-i İstanbul’da Yenibahçe kurbünde sâkine ve zâtı ta‘rîf-i şer‘î ile mu‘arrefe olan Hadîce bt. Mehmed nâm hatun Mumcu İsmail Beşe mübâşeretiyle meclis-i şer‘a ihzâr ettirdiği Rukiye bt. Hüseyin nâm hatunun sadrî oğlu ve tarafından husûs-ı âti’l-beyânda vekîl-i sâbitü’l-vekâlesi Mustafa b. Mehmed muvâcehesinde târih-i i‘lâmdan sekiz sene mukaddem İstanbul’da Kazasker Câmi‘i kurbünde vâki‘ Dergâh-ı âlî altmışıncı bölük yeniçerileri odasına mevkūfe lede’l-ahâlî ma‘lûmü’l-hudûd tasarrufumda olan bir bâb menzilimi bâ-ma‘rifet-i mütevellî müvekkile-i mezbûre Rukiye Hatun’a yüz otuz beş guruş bedel-i makbûza ferâğ-ı kat‘î ile ferâğ ve tefvîz eylediğimden sonra müvekkile-i mezbûre menzil-i mezkûru iki yüz seksen beş guruş bedel-i makbûza bâ-ma‘rifet-i mütevellî âhara ferâğ ve tefvîz etmekle müvekkile-i mezbûre makbûzum olan bedel-i mezkûrdan ziyâde âhardan ahz u kabz eylediği yüz beş guruşu taleb ederim deyü olan da‘vâsı takrîr-i meşrûhu üzere sahîha olmamağla vekîl-i mezbûra suâl dahi teveccüh etmemekle mezbûre Hadîce bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 22 Receb sene 1162