Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 266 Hüküm no: 288 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi b. Osman’ın, Mustafa b. Mehmed’e olan borcunu ödemesi Ma‘rûz Mumcu Mehmed Beşe mübâşeretiyle Bâb Mahkemesi’ne ihzâr olunan Abdullah Efendi b. Osman’ın hasmı Mustafa b. Mehmed meclis-i şer‘-i hatîrde mezbûr Abdullah Efendi b. Osman muvâcehesinde bâ-temessük cihet-i karz-ı şer‘îden dört yüz guruş ve bir re’s bargir semeninden dahi on dokuz guruş ki cem‘an dört yüz on dokuz guruş mezbûr Abdullah Efendi zimmetinde hakkım vardır deyü ba‘de’d-da‘vâ ve’s-suâl mezbûr Abdullah Efendi’nin cevâbında ber-vech-i muharrer meblağ-ı mezbûr dört yüz guruş deyni olduğunu ikrâr lâkin yüz guruşunu gāib ani’l-meclis Süleyman nâm kimesneye deynim olan yüz guruşa kefîl olmamla kefâletime binâen yüz guruşu mezbûr Süleyman’a edâ eyledim deyü ba‘de’d-def‘ ve’l-inkâr mezbûr Abdullah Efendi def‘-i mezbûrunu beyâna havâle olundukdan sonra ikrârı mertebesi olan meblağ-ı mezbûr üç yüz on dokuz guruşu müdde‘î-i mezbûr Mustafa’ya edâ ve teslîme mezbûr Abdullah Efendi’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 21 Recebi’l-ferd sene 1162