Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 268 Hüküm no: 293 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin Mehmed’in, itaat etmesi talebiyle Zeyneb bt. Abdullah’a açtığı davada Zeyneb’in muhâlaa yoluyla boşandığını ispat etmesiyle davanın reddedildiği Ma‘rûz Sahib-i arzuhâl Müezzin Mehmed meclis-i şer‘-i hatîrde derûn-ı arzuhâlde mezkûreti’l-ism Zeyneb bt. Abdullah nâm hatun muvâcehesinde mezbûre Zeyneb Hatun on beş guruş mehr-i müeccel tesmiyesiyle zevce-i menkûham olup hâlâ nefsini bana teslîmden imtinâ‘ eder suâl olunup teslîme tenbîh olunmak matlûbumdur deyü ba‘de’d-da‘vâ ve’s-suâl mezbûre Zeyneb Hatun cevâbında ber-vech-i muharrer ol mikdâr mehr-i müeccel tesmiyesiyle müdde‘î-i mezbûrun zevcesi olduğunu ikrâr lâkin târih-i i‘lâmdan üç ay mukaddem mehr-i mezkûrem ve nafaka-i iddetim üzerlerine ve meûnet-i süknâm dahi kendi üzerime olmak üzere mezbûr Müezzin Mehmed ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete müte‘allika âmme-i da‘vâdan herbirimiz âharın zimmetini ibrâ ve ıskāt etmişidik deyü ba‘de’d-def‘ ve’l-inkâr mezbûre Zeyneb Hatun def‘-i mezkûrunu lede’t-tezkiye adâletleri zâhir olan el-Hâc Mustafa Efendi b. el-Hâc Pîrî ve el-Hâc Abdullah b. el-Hâc Habib ve Mustafa b. Mehmed ve Hüseyin b. Mustafa nâm kimesneler şehâdetleriyle mezbûr Müezzin Mehmed muvâcehesinde vech-i şer‘î üzere isbât etmeğin mûcebince müdde‘î-i mezbûr Müezzin Mehmed bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 25 Receb sene 1162