Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 55 Hüküm no: 17 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinop’un Çarşamba nâhiyesindeki Kutluhanı Vakfı tevliyetinin kime ait olduğunun araştırıması Ma‘rûz, İşbu arzuhâl ve derkenârlar mütâla‘a olundukda asâkir-i hâssa-i şâhâneden Mülâzım Ahmed Ağa kullarının Südde-i sa‘âdete takdîm eylediği arzuhâli mefhûmunda Sinob sancağında Çarşamba nâhiyesinde vâki‘ babası Mehmed nâm kimesne ile bâ-berât-ı âlîşân bi’l-münâsafa mütevellîsi oldukları Kutluhanı nâm-ı diğer Kerbansaray Vakfı’nın arâzî ve müsakkafât-ı sâiresinden mütevellîye âid olan öşr-i mahsûlü nâhiye-i mezbûre ahâlîsinden Öküzoğlu Mehmed b. Mustafa ve Karagülleoğlu Ömer nâm kimesneler bin iki yüz yirmi üç senesinden berü bilâ-sened ashâb-ı zirâ‘atden tegallüben ahz eylediklerinden bahisle mahâllinde ma‘rifet-i şer‘le olunması bâbında emr-i âlîşân sudûrunu istid‘â etmekle kuyûda lede’l-mürâca‘a tevliyet-i mezkûre vech-i meşrûh üzere merkūmun bâ-berât-ı âlîşân üzerlerinde olduğu Anadolu Muhâsebesi’nden derkenâr olunmağla sahib-i arzuhâl merkūmun yedinde olan fetvâ-yı şerîfeye nazar olundukda bir vakıf karye toprağında tapu ile tarlalara mutasarrıf olan kimesnelerin ber-mûceb-i emr ü defter mütevellîye verecekleri öşr-i mahsûlü Amr tegallüben ol kimesnelerden ahz ile mütevellîsi ol kimesnelerin tevkîli ve ihâleleriyle öşr-i merkūmu vakıf için Amr’dan almağa kādir olur deyü mastûr ve musarrah olmağın bu sûretde mahâllinde meclis-i şer‘-i şerîfde müfti ve bi’l-cümle ulemâ-i belde ve vücûh-ı ahâlî hazır oldukları hâlde evvelâ vakf-ı mezkûr toprağında arâzî ve müsakkafâtve sâir akārâta mutasarrıf olanlar kimler ise herbiri taraflarından mütevelliyân-ı mezbûrân Mehmed ve Ahmed’i vech-i şer‘î üzere tevkîl eylediklerinden sonra müvekkilleri olan ashâb-ı [6a] zirâ‘atin ol târihden berü beher sene mütevellîye verecekleri öşr-i mahsûlün buğday ve ecnâs ve evsâfını beyân ile tashîh-i da‘vâ olunarak mütevelliyân-ı mezbûrân Ahmed ve Mehmed ile merkūmân Öküzoğlu Mehmed ve Karagülleoğlu Ömer’i bi’l-muvâcehe gadr ve himâyeden ârî hak ve adl üzere ber-nehc-i şer‘î mürâfa‘a edip zımnında ne vechile hükm-i şer‘î lâhık olur ise ona göre iktizâsına bakılmak için emr ü fermân. Fî 15 M sene [12]48