Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 273 Hüküm no: 300 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafının, sürekli olarak dikicibaşılarının aleyhine çalışan ve huzursuzluk çıkaran Mestçi Bodur Mustafa b. Ömer ile İskilibli Ali Usta’nın esnaflıktan menedilmeleri talepleri Bâ-mühr-i hazret-i efendi Ma‘rûz İstanbul’da vâki‘ dikici tâifesinin Müslim ve zimmî ustalarından cerîdede mazbûtü’l-esâmî iki yüz neferden mütecâviz ustalar meclis-i şer‘de derkenârda mezkûrü’l-ism bâ-berat-ı âlîşân dikicibaşıları olan İsmail Çelebi b. İbrahim hazır olduğu hâlde hirfet-i mezkûre ustalarından Mestçi Bodur Mustafa b. Ömer ve İskilibî Ali Usta muvâcehelerinde hâlâ berat-ı âlîşân dikicibaşımız ve cümlemizin muhtârı olan işbu İsmail Çelebi esnâfımızdan kimesneyi bi-gayr-ı hakkın tekdîr ve ta‘cîz ve tecrîm etmeyip tamam nizâm-ı kadîmimiz üzere hareket etmekle herbirimiz mezbûrdan hoşnûd ve râzı iken bundan akdem bir def‘a dahi işbu mezbûrân Mestçi Bodur Mustafa ve İskilibî Ali Usta ve refîkleri olan birkaç kimesneler birbirleriyle yek-dil olup mezbûr İsmail’i ref‘ ve yerine âharı nasb ettirmek sevdâsıyla hilâf-ı vâki‘ cümle esnâf lisânından arzuhâl ve teşekkî sadedinde olmalarıyla mezbûrlar bu husûsu me’kel ittihâz edip celb-i menfa‘atleri’çün bu makūle bî-vech azl ü nasb ettirmeğe sa‘y ettikleri ihbâr ve gıbbe’l-istintâk sâdır olan kelimât-ı bî-hûdelerinden zâhir ve mütebeyyin olmağla merâmlarına müsâ‘ade olunmayıp mezbûr İsmail Çelebi’nin kemâ-kân ibkāsı ricâsında olduğumuz târih-i i‘lâm senesi şehr-i Rebî‘ülevvel’inin on sekizinci günü kıbel-i şer‘den i‘lâm olunmağla mûcebince ibkā olunmak deyü musahhah emr-i âlî sâdır olmağın ile’l-ân cümlemiz âsûde olmuşidik el-hâletü hâzihî işbu mezbûrân Mestçi Bodur Mustafa ve İskilibî Ali Usta kendi hâllerinde olmayıp cümle esnâf lisânından hilâf-ı vâki‘ işbu arzuhâli etmişler arzuhâlden ve şikâyetden esnâfımızın haber ve âgâhları yokdur dikicibaşımız olan işbu mezbûr İsmail Çelebi’nin min-külli’l-vücûh evzâ‘ ve etvârından herbirimiz râzı ve hoşnûduz lâkin işbu mezbûrân kendi hevâ ve fesâdlarını icrâ için esnâfımızdan bazı hevâlarına müsta‘id olanları dâimâ tahrîk ve bu makūle hilâf-ı vâki‘ arzuhâl ile cümlemizi tekdîr ve ta‘cîz etmeleriyle tevbe ve salâhları zâhir olunca esnâfımızdan tedîben tard ve ib‘âd olunmaları bâbında emr-i âlî sudûrunu istid‘â ve istirhâm ederiz dediklerinde fi’l-hakīka mezbûr Dikicibaşı İsmail’den mezbûrândan gayri teşekkî eder kimesne olmayıp ve mezbûrân dahi kat‘a bize gadr etmedi lâkin nizâma ihtilâl verir ve esnâf teşekkî eder deyü hilâf-ı zâhir kelimât-ı bî-hûde söylemeleriyle mezbûrânın te‘dîbleri’çün esnâf-ı mezkûrenin ber-vech-i muharrer istid‘â ve istirhâmları ma‘lûm-ı devletleri buyruldukda emr ü fermân hazret-i veliyyü’l-emrindir. Fî 27 Receb sene 1162