Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 276 Hüküm no: 305 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim b. Yusuf’a borcundan dolayı hapiste olan Seragan v. Arakil’in fakir olduğu tespit edildiğinden hapisten serbest bırakılması Ma‘rûz Derkenârda mastûrü’l-ism Seragan v. Arakil nâm [zimmî] meclis-i şer‘-i enverde dâyini olup yine derkenârda mezkûr el-Hâc İbrahim b. Yusuf muvâcehesinde mezbûr el-Hâc İbrahim’e zimmetimde yüz altı guruş on para deynim olmağla hükm-i hâkimle üç buçuk aydan mütecâviz sicn-i sultânîde mahbûs olup üzerimde olan köhne libâsından mâ‘adâ ism-i mâl ıtlâk olunur bir nesneye mâlik olmamağla habsden ıtlâk olunmak murâdımdır deyü da‘vâ ol dahi ber-vech-i muharrer mesfûr Seragan zimmetinde bâ-i‘lâm yüz altı guruş on altı para hakkı olup üç buçuk aydan mütecâviz mahbûs olduğunu i‘tirâf lâkin edâ-i deyne kudreti vardır deyü olan da‘vâsını beyâna kādir olamayıp mesfûr Seragan zimmînin fakīr ve mu‘sir ve mu‘dim ve bir vechile deyn-i mezkûrunu edâya kudreti olmadığını zimmî-i mesfûrun hâline vukūfu olan bî-garaz Müslimînden olup mahmiye-i İstanbul’da sâkin olduğu Sultan Bâyezid-i Cedîd mahallesi imâmı Süleyman Efendi ve ahâlîsinden İbrahim Efendi b. Abdullah ve Süleyman Ağa b. İbrahim ve el-Hâc İsmail b. İbrahim ve Mehmed b. İbrahim ve Mehmed Ağa b. Ali ve el-Hâc Mahmud b. Abdullah ve Mehmed b. Mehmed ve Lütfullah b. Hüseyin ve Ömer b. Murad nâm kimesnelerden herbiri alâ-tarîkı’ş-şehâde haber vermeleriyle mesfûr Seragan zimmînin yesârı sâbit olmadıkca habsi meşrû‘ olmayıp habsden ıtlâk iktizâ eylediği Mahkeme-i Bâb’dan huzûr-ı âlîlerine i‘lâm olundu. Fî 28 Recebi’l-ferd sene 1162