Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 276 Hüküm no: 306 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmâm Mustafa Efendi’nin yeniçerilerilerin yirmi sekizinci bölüğü vakfından aldığı borcu ödemesi Ma‘rûz Dergâh-ı âlî --dâme mahfûfen bi’l-meâli- yeniçerilerinin yirmi sekizinci bölüğün bi’l-fi‘il mütevellîsi sahib-i arzuhâl Hasan Odabaşı meclis-i şer‘-i hatîrde derûn-ı arzuhâlde mezkûrü’l-ism İmâm Mustafa Efendi mahzarında mezbûr Mustafa Efendi’ye mütevellîsi olduğum oda-i mezkûrun nukūd-ı mevkūfesinden iki yüz otuz guruş ber-mûceb-i temessük ikrâz ve teslîm eylediğimde ol dahi ber-vech-i muharrer istikrâz ve kabz ve istihlâk etmişidi hâlâ meblağ-ı mezkûr [iki yüz] otuz guruşu mezbûr Mustafa Efendi’den bi’t-tevliye taleb ederim deyü ba‘de’d-da‘vâ ve’s-suâl ol dahi cevâbında ancak iki yüz guruş deyni olduğunu ikrâr mâ‘adâ otuz guruşu inkâr etmeğin alâ-mûceb-i i‘tirâfihî iki yüz guruşu mütevellî-i merkūm Hasan Odabaşı’ya edâ ve teslîme mezbûr Mustafa Efendi’ye ba‘de’t-tenbîh ziyâde müdde‘âsi’çün mütevellî-i mezbûr Hasan Odabaşı beyâna havâle olunduğu Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî-gurreti Şa‘bân sene 1162