Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 277 Hüküm no: 307 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Hristori’nin, Ahıska Valisi Ahmed Paşa’nın çukadarı Derviş Ahmed Ağa b. Abdullah’a olan borcunu ödemesine yapılan tenbih Bâ-mühr-i hazret-i [efendi] Ma‘rûz Hâlâ Ahıska Vâlîsi Ahmed Paşa hazretlerinin çukadârlarından Derviş Ahmed Ağa b. Abdullah tarafından ber-vech-i âtî vekâlet iddi‘â eden Ali Efendi b. Mehmed huzûr-ı âlîlerinde ma‘kūd meclis-i şer‘de sahib-i arzuhâl Yamandi v. Hristori nâm zimmî ile terâfu‘larında müvekkilim mezbûr Derviş Ahmed Ağa işbu yedimde olan temessük mûcebince bin yüz kırk sekiz senesi Zilka‘de’sinde İstanbul’da Hocapaşa kurbünde Kör Ali Ağa menzilinde malından yüz guruş işbu mesfûr Yamandi zimmîye ikrâz ve teslîm edip ol dahi yedinden ba‘de’l-istikrâz ve’t-tesellüm ve’l-istihlâk meblağ-ı mezkûr yüz guruş ol vechile zimmetinde hakkı olup ve meblağ-ı mezkûru mesfûr Yamandi’den taleb ve da‘vâ ve ahz u kabza beni tarafından vekîl etmekle meblağ-ı mezkûr yüz guruşu mesfûr Yamandi’den bi’l-vekâle taleb ederim deyü ba‘de’d-da‘vâ ve’s-suâl mesfûr Yamandi deyn-i mezkûrunu ve mezbûrun vekâletini bi’l-külliye inkâr etmeğin müdde‘î-i mezbûr müdde‘âsını lede’t-tezkiye adâletleri zâhir olan el-Hâc Süleyman Usta b. Ömer ve Ahmed Efendi b. Mahmud Beşe b. el-Hâc Süleyman ve diğer Ahmed Efendi b. Hasan şehâdetleriyle mesfûr Yamandi zimmî muvâcehesinde vech-i şer‘î üzere isbât etmekle mûcebince meblağ-ı mezkûr yüz guruşun vekîl-i merkūm Ali Efendi’ye tamamen edâ ve teslîmi ile mesfûr Yamandi zimmîye tenbîh-i şer‘î olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî-selhi Receb sene 1162