Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 277 Hüküm no: 308 Orijinal metin no: [39b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir b. Ali’yi yaralayan yeniçeriler İbrahim Beşe b. Hasan ile Seyyid Veli b. Mehmed’e verilecek cezaların yaraların iyileşmesine kadar ertelendiği Ma‘rûz Mahmiye-i İstanbul’da Çukur Hamamı dellâklarından Mehmed b. Süleyman tarafından husûs-ı âti’l-beyânda vekîl-i müsecceli Ebûbekir b. Ali Mumcu Mehmed Beşe mübâşeretiyle meclis-i şer‘-i enverde ihzâr ettirdiği doksan yedi cemâ‘at odası neferâtından İbrahim Beşe b. Hasan ve es-Seyyid Veli b. Mehmed muvâcehelerinde târih-i i‘lâmdan altı gün mukaddem Pazar günü ahşama garîb mahmiye-i İstanbul’da Çırçır Çarşısı’nda çörekçi fırını hizâsında mezbûr Mehmed Beşe müvekkilim mezbûr Mehmed’in sol omuzu başına karîb mahalle ve sol küreği üzerine ve sol kulağı üzerine Yatağan ta‘bîr olunur âlet-i câriha ile bi-gayr-ı hakkın darb ve cerh edip ve mezbûr es-Seyyid Veli dahi zeruste? ta‘bîr olunur sopa ile sol kolunun üzerine darb ve kara bere etmekle mûceb-i şer‘îlerini bi’l-vekâle taleb ederim deyü ba‘de’d-da‘vâ ve’l-inkâr vekîl-i mezbûr Ebûbekir Beşe ber-vech-i muharrer müdde‘âsını lede’ş-şer‘ adâletleri zâhir olan Berber Mustafa [40a] b. Hasan ve saraç Osman b. Hüseyin şehâdetleriyle mezbûrân İbrahim Beşe ve es-Seyyid Veli Beşe muvâcehelerinde isbât etmeğin mûcebince cürûh-ı mezkûrun hükmü ber’-i tâm husûlüne tevkīf iktizâ eylediği bi’l-iltimâs huzûr-ı âlîlerine Mahkeme-i Bâb’dan i‘lâm olundu. Fî 3 Şa‘bân sene 1162