Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 278 Hüküm no: 310 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kutnici esnafından Agop ve Avadik’in, nizama aykırı olarak Mardin kuşağı işlemekten menedildikleri Ma‘rûz Mahmiye-i İstanbul’da Mardin kuşağı işleyici esnâfının kethudâları es-Seyyid Abdurrahim Çelebi b. es-Seyyid Mahmud ve yiğitbaşıları Hasan Beşe b. Hasan ve ustalardan es-Seyyid Hüseyin b. Hasan ve es-Seyyid Ahmed b. Hüseyin ve Mehmed b. Ömer ile zimmî ustalardan Sava v. İsayi meclis-i şer‘-i enverde arzuhâlde mezkûr sandalcı esnâfından Agop v. Bogos ve kutnîci tâifesinden Avadik v. Şahin zimmîler muvâcehelerinden öteden beri bir esnâfın ustaları âhar esnâf ustalarına mahsûs olan emti‘ayı işlemek nizâm-ı kadîme mugāyir olup esnâf beynlerinde ihtilâle bâ‘is olur hâlâtdan olup ve mesfûr Agop sandalcı esnâfından ve merkūm Avadik kutnîci esnâfından iken bizlere mahsûs olan Mardin kuşağı olan metâ‘ımızı dahi işleyip nizâmımıza ihtilâl verirler deyü teşekkî ve men‘lerine tenbîh taleb ederiz deyü olan da‘vâlarında mesfûrân Agop ve Avadik âhar esnâfdan müdde‘ûn-ı mesfûrûna mahsûs kuşak-ı mezkûru işlediklerini ba‘de’l-ikrâr fîmâ-ba‘d işlememeğe ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu. Fî 25 Ş sene 1162