Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 279 Hüküm no: 311 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kör Yusuf b. Süleyman’ın, tarla icarından dolayı Musa Beşe b. Ahmed’e açtığı davada haksız bulunduğu Ma‘rûz Bâ‘is-i i‘lâm A‘mâ Yusuf b. el-Hâc Süleyman meclis-i şer‘de Musa Beşe b. Ahmed muvâcehesinde vilâyet-i Anadolu’da Karacaviran kazâsına tâbi‘ Ağılözü nâm karye toprağında vâki‘ lede’l-ahâlî ve’l-cîrân ma‘lûmü’l-hudûd tarlamı beher sene altışar keyl şa‘îr vermek üzere mezbûr Musa Beşe’ye îcâr ol dahi ba‘de’l-istîcâr ve’l-kabûl târih-i i‘lâma gelince tarla ücretinden mezbûr Musa Beşe zimmetinde yirmi bir senede müctemi‘ yüz yirmi altı keyl şa‘îrden on bir senede iktizâ eden altmış üç keyl şa‘îri ahz ve istifâ etmemle bâkī on bir senelik altmış üç keyl şa‘îr zimmetinde <> kalmağla taleb ederim deyü da‘vâ ol dahi tarla-yı mezkûru ber-vech-i muharrer kendiye îcârını ikrâr lâkin târih-i i‘lâmdan sekiz gün mukaddem İstanbul’da Odunkapısı’nda vâki‘ manav dükkânımda mezkûr tarlanın ücretini târih-i i‘lâm senesi gāyetine gelince huzûr-ı Müslimînde ba‘de’l-hesâb ücret-i mezkûreden zimmetimde sekiz guruş ve bir rub‘ guruş hakkı zuhûr edip meblağ-ı mezbûr sekiz guruş ve bir rub‘ guruşu dahi kendiye edâ ve teslîm ol dahi ba‘de’l-ahz ve’l-kabz husûs-ı mezkûra müte‘allika âmme-i da‘vâdan zimmetimi ibrâ etmişidi deyü ba‘de’d-def‘ ve’l-inkâr mezbûr Musa Beşe def‘-i mezkûrunu udûlden Osman b. Abdullah ve Ahmed b. Mustafa şehâdetleriyle isbât etmeğin mûcebiyle mezbûr A‘mâ Yusuf bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 3 Şa‘bân sene 1162