Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 281 Hüküm no: 314 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fenerkapısı camcılarından iken nizama aykırı olarak Eyüb’de dükkân açan Hüseyin Çelebi b. Ahmed’in dükkânını kapatıp yine eski dükkânına yakın bir yerde camcılık yapması Bâ-mühr-i hazret-i efendi Ma‘rûz Ashâb-ı arzuhâl camcı esnâfının kethudâları Mehmed Çelebi ve yiğitbaşıları İbrahim Çelebi ve ihtiyâr ustalarından el-Hâc Ali ve İsmail Çelebi ve Hüseyin Çelebi ve es-Seyyid Eyüb Çelebi ve el-Hâc Hüseyin ve Camcıbaşı Mehmed Çelebi ve sâir cerîdede mazbûtü’l-esâmî yirmi neferden mütecâviz ustalar meclis-i şer‘de yine esnâf-ı mezkûre ustalarından Hüseyin Çelebi b. Ahmed muvâcehesinde işbu yedimizde olan mümzâ ve mahtûm defter ve tuğrâ-yı garrâ ile mu‘anven emr-i âlîşân mûcebince ez-kadîm nizâmımız İstanbul ve Galata ve Üsküdar ve Eyüb ve tevâbi‘inde cem‘an doksan üç aded gedikli camcı dükkânı olup dekâkîn-i mezbûre kâfî olmağla bunlardan ziyâde dükkân ihdâs olunmayıp ve bi’l-iktizâ birisi tebdîl olunmak lâzım olur ise yine bulunduğu mahâllin kurb ve civârında bir dükkân ile tebdîl olunup âhar mahalle naklolunmamak üzere nizâm-ı kadîmimiz olup ve bu nizâm ilâ-yevminâ hâzâ beynimizde cârî ve düstûrü’l-amel iken işbu mezbûr Hüseyin Çelebi otuz seneden mütecâvizdir Fenerkapısı dâhilinde müste’ciren sâkin olduğu dükkânda bir gediğe mutasarrıf olup sahibi dükkân-ı mezkûrdan ihrâc ettirdikde yine mahâll-i mezkûra karîb bir dükkân tedârik etmek lâzım iken mezbûr hilâf-ı nizâm-ı kadîm Ebî Eyyûb-i Ensârî’de bir dükkân küşâd edip ihtilâl-i nizâm-ı kadîmimize bâdî olmağla kadîmî üzer[e] yine Fenerkapısı civârında bir dükkân peydâ ve küşâd etmek üzere tenbîh olunmak matlûbumuzdur deyü takrîrlerine mutâbık emr-i âlî ve senedât ibrâz etmeleriyle gıbbe’s-suâl mezbûr Hüseyin Çelebi b. Ahmed nizâm-ı kadîmleri minvâl-i muharrer üzere olduğunu ve Fenerkapısı dâhilinde mutasarrıf olduğu camcı gediğini Ebî Eyyûb-i Ensârî’de istîcâr eylediği dükkâna naklini mukır ve mu‘terif olmağın ez-kadîm beynlerinde bi’l-ittifâk cârî olan nizâmları üzere yine Fenerkapısı civârında dükkân istîcâr edip mutasarrıf olduğu gediği ile sâkin olup âhar mahalle gedik nakletmemek üzere tenbîh olunduğu huzûr-ı âlîlerine i‘lâm olundu. Fî 5 Şa‘bân sene 1162