Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 281 Hüküm no: 315 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci olmadığı halde nizama aykırı olarak peynir şekeri işleyip satmaya adet haline getiren Avram v. İlya’nın cezalandırılması Bâ-mühr-i hazret-i efendi Ma‘rûz Şekerci esnâfının kethudâları el-Hâc Ali ve yiğitbaşıları İsmail ve ustalarından İsmail ve Musa ve Ahmed ve Mehmed ve İsa ve sâir cerîdede mazbûtü’l-esâmî on neferden mütecâviz ustalar meclis-i şer‘a Mumcu es-Seyyid Ali mübâşeretiyle ihzâr ettirdikleri Avram v. İlya nâm Yahûdî muvâcehesinde ez-kadîm işlemesi ve bey‘i bâ-fermân-ı âlî esnâfımıza mahsûs olan peynir şekerini işbu Yahûdî san‘atımızda ecnebi iken işleyip bey‘ etmekle hilâf-ı emr-i âlî hareketi ihtilâlimize bâdî olmağla bundan akdem bi’d-defa‘ât mesfûr hilâf-ı emr-i âlî peynir şekeri ve sâir esnâfımıza mahsûs olanları işlemekden men‘ ve taraf-ı şer‘den tenbîh olunmuşiken mesfûr bir vechile mütenebbih olmayıp bu def‘a yine memnû‘ olan işbu meclis-i şer‘de mevcûd peynir şekerini işleyip bey‘ etmekle külliyyen ihtilâlimize bâdî olmuşdur deyü teşekkî ve takrîrlerine mutâbık tuğrâ-yı garrâ ile mu‘anven emr-i âlîşân ibrâz etmeleriyle gıbbe’s-suâl mesfûr Avram Yahûdî şekerci esnâfından olmadığını ve hilâf-ı emr-i âlî peynir şekerini işlediğini ve mukaddemâ bi’d-defa‘ât men‘ ve tenbîh olunduğunu mukır ve mu‘terif olmağla tekrar men‘ ve tenbîh olunup mukaddemâ olan tenbîhât ile mütenebbih olmayıp hilâf-ı emr-i âlî hareketi için iktizâ eden tedîbi re’y-i rezîn-i âsafânelerine ihâle olunduğu huzûr-ı âlîlerine i‘lâm olundu. Fî 5 Şa‘bân sene 1162