Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 283 Hüküm no: 318 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbentçi esnafının, hareket ve tavırlarından memnun olmadıkları kethudaları Hacı Mustafa b. Ömer’in azledilip yerine Hacı Hüseyin b. Abdullah’ın tayin edilmesi talepleri Bâ-mühr-i hazret-i efendi Ma‘rûz Dülbendci esnâfından Vefâlızâde Mustafa Efendi ve İbrahim Çelebi ve diğer el-Hâc İbrahim ve el-Hâc İsmail ve el-Hâc Mustafa ve el-Hâc Ali ve Hasan Çelebi ve Salih Çelebi ve el-Hâc Abdülkerim ve zimmîlerden Asba ve Avanis ve Uzun Simyon ve Arakil ve Mergus ve Ohan ve Kigork ve Avanis ve Avadik ve Ohan ve Ağagül ve Melkon ve Şahnazar ve Karabet ve Kabril ve Mikail ve sâir Müslim ve zimmî yüz neferden mütecâviz dülbendci meclis-i şer‘de bâ-berat-ı âlîşân kethudâları olan el-Hâc Mustafa b. Ömer hazır olduğu hâlde işbu mezbûr el-Hâc Mustafa kethudâmız olup lâkin mezbûr bazımızı tecrîm ve tagrîm ettirdip bazımızı dahi lisânıyla ve evzâ‘ıyla tekdîr ve ta‘cîz edip el-hâsıl mezbûr el-Hâc Mustafa’nın evzâ‘ ve etvârından herbirimiz hoşnûd ve râzı olmayıp dil-gîr olduğumuzdan ve mezbûr kethudâlığımızdan azl ve yerine yine esnâfımızdan olan işbu hazır bi’l-meclis el-Hâc Hüseyin b. Abdullah cümlemizin muhtârı olmağla üzerimize rızâmız ile kethudâ nasb olunmak matlûbumuzdur deyü merkūm el-Hâc Mustafa’dan bi’l-muvâcehe teşekkî etmeleriyle mezbûrûnun ber-minvâl-i muharrer istid‘âlarına müsâ‘ade-i aliyye ve mezbûr el-Hâc Mustafa kethudâlıklarından azl ve yerine esnâflarından cümlesinin muhtârı olan merkūm el-Hâc Hüseyin nasb ve yedine berat-ı şerîf-i <<âlîler>> âlîşân inâyet ve ihsân buyurulmak bâbında emr ü fermân hazret-i veliyyü’l-emrindir. Fî 6 Şa‘bân sene 1162