Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 284 Hüküm no: 319 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azarya v. Benli’nin, kiracısı olduğu sabun dükkânının icaresi feshedildikten sonra kiralayan Yuvan v. Sava’nın dükkânı boşaltıp kendisine teslim etmesi talebiyle açtığı davanın hukuksuz bulunarak reddedildiği Ma‘rûz Sabuncu tâifesinden Azarya v. Benli zimmî meclis-i şer‘-i hatîrde yine tâife-i mezkûreden Yuvan v. Sava zimmî muvâcehesinde derûn-ı arzuhâlde mezkûr Arpa İskelesi’nde vâki‘ ma‘lûmü’l-hudûd iki bâb sabuncu dükkânları mukaddemâ benim taht-ı icâremde ve gediği sahibi iken ben diyâr-ı âhara gitmekle dükkânlar-ı mezkûrların sahibleri Hacı Receb oğlu Hacı Mustafa nâm kimesneler dükkânlar-ı mezkûrlarını târih-i i‘lâm senesi Muharremi’l-harâm’ı gurresinden işbu merkūm Yuvan ile karındaşı gāib ani’l-meclis Anaştaş zimmîlere yedlerindeki hüccet-i şer‘iye mantûkunca senevî icâre-i ma‘lûme ile îcâr etmekle benim icârem münfesiha olup ancak ben mukaddemâ dükkânlar-ı mezkûrların müste’ciri ve gediği sahibi olup ve binâsında dahi masrûfum olmağla merkūm Yuvan zimmî dükkân-ı mezkûru tahliye ve bana teslîmine tenbîh taleb ederim deyü olan da‘vâsında takrîr-i meşrûhu üzere zikrolunan dükkânlar mezbûrân Hacı Receb ve oğlu Hacı Mustafa’nın olduğunu ve mezbûrân Hacı Receb ve oğlu Hacı Mustafa zikrolunan dükkânları ber-vech-i muharrer merkūm Yuvan zimmî ve karındaşına îcâr ve kendinin icâresi münfesiha olduğunu ikrârından sonra dükkânlar-ı mezkûrların mukaddemâ gediği benim olmağla taleb ederim deyü olan da‘vâsı sahîha olmamağla hasmı mesfûr Yuvan zimmîye şer‘an suâl dahi teveccüh etmeyip müdde‘î-i merkūm bî-vech-i şer‘î mu‘ârazadan men‘ olunduğu Bâb’dan huzûr-ı âlîlerine i‘lâm [olundu] fermân men-lehu’l-emrindir. Fî 7 Şa‘bâni’l-mu‘azzam sene 1162