Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 284 Hüküm no: 320 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Serkiz’in borçlarını taksitle ödeme teklifi borçlularınca kabul edildiğinden hapisten çıkarılması Ma‘rûz Hâmiş-i arzuhâlde mezkûr Serkiz zimmîye doksan altı guruş deyni için otuz yedi günden beri sicn-i sultânîde mahbûs olan arzuhâl sahibi Kogas v. Arakil zimmî meclis-i şer‘de Mehmed b. Mahmud’a cihet-i karzdan iki yüz guruş ve Anaştaş v. Kosta’ya kezâlik cihet-i karzdan yüz guruş ve Vartan v. Sahak’a kezâlik cihet-i karzdan yüz yirmi beş guruş ve Ebran v. Matyos’a kezâlik cihet-i karzdan yüz elli guruş ve Toma v. Bogos’a kezâlik cihet-i karzdan kırk yedi guruş ve Artin v. Ohan’a kezâlik cihet-i karzdan doksan guruş ki cem‘an sekiz yüz kırk bir guruş deyni olduğu mezkûrûn ile merkūm Serkiz muvâcehelerinde ikrârıyla ba‘de’s-sübût mu‘dim ve mu‘sir ve müflis olduğunu iddi‘â ve tecîl ve taksîte tâlib olduğunda merkūm Serkiz’den mâ‘adâ mezkûr dâyinleri târih-i kitâbdan kendilere guruş başına beher mâh birer akçe vermek üzere mezbûr Kogas’ı tecîl ve taksît eylediklerinde ol dahi râzı ve ber-vech-i muharrer müddet-i ma‘lûme tamamına değin edâya ta‘ahhüd edip ve mezbûr Serkiz taksîte râzı olmayıp merkūm Kogas’ın yesârını da‘vâ ve bir vechile edâ-i deyne kudretini ve yesârını beyâna kādir olmayıp ve mezkûr dâyinleri ve sâir ahvâline vukūfu olan kimesneler üzerinde lâbis olduğu libâsından mâ‘adâ ism-i mâl ıtlâk olunur nesneye mâlik olmayıp düyûnunu def‘aten edâya iktidârı yokdur deyü merkūm Kogas’ın mu‘dim ve mu‘sir ve müflis olduğunu mezbûr Serkiz muvâcehesinde alâ-tarîkı’ş-şehâde haber vermeleriyle medyûn-ı mezbûr Kogas’ın yesârı sâbit olmadıkca <> habsi meşrû‘ olmayıp habsden ıtlâkı iktizâ eylediği Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 7 Şa‘bâni’l-mu‘azzam sene 1162