Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 286 Hüküm no: 323 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan bt. Magar’ın varislerinden annesi Dadora ile kardeşi Hazar’ın, mûriselerinin mehir bedelinden alacağı olduğu iddiasıyla Mercan’ın kocası İsrail’e açtıkları davada haksız bulundukları Ma‘rûz İstanbu[l’da] Cibali Kapısı hâricinde Seferikoz mahallesinde mütemekkine iken bundan akdem hâlike olan Mercan bt. Mağar v. Hayim nâm Yahûdiye’nin verâseti zevci İsrail v. Yuda ile anası Dadora bt. Hayim ve li-ebeveyn er karındaşı Hazar Yahûdilere ba‘de tahakkukı’l-inhisâr zâtı ta‘rîf-i şer‘î ile mu‘arrefe olan merkūmân Dadora ve Hazar Yahûdiler meclis-i şer‘-i hatîrde zevc-i mesfûr İsrail muvâcehesinde mûrisemiz hâlike-i merkūmenin zevci mesfûr İsrail zimmetinde mütekarrer ve ma‘kūdün-aleyh iki bin beş yüz guruş mehr-i müsemmâsı olmağın hâlâ mesfûr İsrail Yahûdî’ye suâl olunup meblağ-ı mezbûrdan bize isâbet eden bin iki yüz elli guruş hakkımızı bi’l-verâse taleb ederiz deyü ba‘de’d-da‘vâ ve’s-suâl mesfûr İsrail cevâbında fi’l-vâki‘ zevce-i hâlike-i mesfûreye zimmetinde ol kadar guruş mehr-i deyni olduğunu ikrâr lâkin vârisân-ı merkūmân ile hâlike-i mesfûrenin helâkinden bir ay sonra ve târih-i i‘lâmdan beş ay mukaddem hâlike-i mesfûrenin mehr-i mezkûrundan hisselerinden benim ile kırk guruş bedel-i makbûza sulh olup mâ‘adâ-yı mehr ve tereke-i hâlike-i mesfûreye ve târih-i mezkûra gelince beynimizde cârî âmme-i ahz u i‘tâya müte‘allika âmme-i de‘âvî ve mutâlebât ve kâffe-i eymân ve muhâsamâtdan benim zimmetimi ibrâ-i âmla ibrâ etmişidi deyü ba‘de’d-def‘ ve’l-inkâr mesfûr İsrail Yahûdî def‘-i meşrûhunu ahrâr-ı ricâl-i Yahûddan lede’t-tezkiye şehâdetleri makbûle olan Çukacı Yako Yahûdî v. Mosi ve Kamal Yahûdî v. Ellez şehâdetleriyle merkūmân Dadora ve Hazar Yahûdiler muvâcehelerinde vech-i şer‘î üzere ba‘de’l-isbât ve’l-kabûl mûcebiyle ba‘de’l-hükm vârisân-ı müdde‘iyân-ı merkūmân da‘vâ-yı mezkûreleriyle bî-vech-i şer‘î zevc-i mesfûr İsrail’e mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 7 min-Şa‘bâni’l-mu‘azzam sene 1162