Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 287 Hüküm no: 325 Orijinal metin no: [41b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Sahak’ın, Pedros’dan alacağına kefil olduğu iddiasıyla Aleksan v. Zakarya’ya açtığı davayı ispat edemediği Ma‘rûz Kuyumcu tâifesinden Asvador v. Sahak nâm zimmî meclis-i şer‘-i hatîrde tâife-i mezbûreden Aleksan v. Zakarya zimmî muvâcehesinde işbu hazır bi’l-meclis Pedros v. Bogos nâm zimmî yedinden târih-i i‘lâmdan bir sene mukaddem İstanbul’da Mahmud Paşa Câmi‘-i şerîfi kurbünde vâki‘ bir bâb kuyumcu dükkânı gediğini yüz yetmiş guruş semen-i medfû‘ ve makbûza iştirâ eylediğimde meblağ-ı mezkûra bi’l-emr ve’l-kabûl kefâlet-i sahîha-i şer‘iye ile işbu merkūm Aleksan zimmî kefîl bi’l-mâl olmuşidi hâlâ bey‘-ı mezkûrun fesâdına binâen meblağ-ı mezkûrdan bâkī yüz kırk guruşu bi-hükmi’l-kefâle mesfûr Aleksan zimmîden [42a] taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsını beyâna kādir olmayıp bi’t-taleb mesfûr Aleksan zimmîye vech-i şer‘î üzere yemîn verilmeğin mûcebince müdde‘î-i mersûm Asvador zimmî bilâ-beyyine bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 9 min-Şa‘bân sene 1162