Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 288 Hüküm no: 326 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pedros v. Bogos’un satışı iptal olunan kuyumcu gediğine mahsuben aldığı parayı Kuyumcu Asvador’a iade etmesi Ma‘rûz Kuyumcu tâifesinden sahib-i arzuhâl Asvador nâm zimmî meclis-i şer‘-i hatîrde derûn-ı arzuhâlde mastûrü’l-ism Pedros v. Bogos nâm zimmî muvâcehesinde mesfûr Pedros zimmî târih-i i‘lâmdan bir sene mukaddem İstanbul’da Mahmud Paşa Câmi‘-i şerîfi kurbünde vâki‘ bir bâb kuyumcu dükkânının gediğini yüz yetmiş guruş semen-i medfû‘ ve makbûza bana bey‘ etmişidi hâlâ bey‘-ı mezkûrun fesâdına binâen meblağ-ı mezkûrdan bâkī yüz kırk guruş hakkımı mesfûr Pedros zimmîden taleb ederim deyü ba‘de’d-da‘vâ ve’s-suâl mesfûr Pedros zimmî dahi kazıyye minvâl-i muharrer üzere olduğunu ikrâr ve i‘tirâf etmeğin mûcebince meblağ-ı bâkī-i mezkûr yüz kırk guruşu müdde‘î-i mersûm Asvador zimmîye edâ ve teslîmle mesfûr Pedros zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 9 Ş sene 1162