Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 288 Hüküm no: 327 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Sahak v. Serkiz’in, Mehmed Ağa b. Ömer Efendi ile olan alacak-verecek davasında mahsuplaştıktan sonra kalan borcunu ödemesine yapılan tenbih Ma‘rûz Sahib-i arzuhâl Mehmed Ağa b. Ömer Efendi meclis-i şer‘-i hatîrde derûn-ı arzuhâlde mezkûr Sarrâf Sahak v. Serkiz zimmî muvâcehesinde bin yüz elli senesi Rebî‘ülevvel’inden târih-i i‘lâma gelince merkūm Sarrâf Sahak zimmî işbu yedimdeki temessükât mantûkunca bi’d-defa‘ât malından ve yedinden iktirâz ve ahz ve yine kendiye bi’d-defa‘ât edâ ve teslîm eylediğim kırk sekiz bin dört yüz doksan yedi guruş için benden bilâ-devr-i şer‘î izdiyâd aldığı beş bin sekiz yüz elli bir buçuk guruş ribh alıp ve hatta târih-i i‘lâmdan on gün mukaddem benim Ma‘cûnî Kasım mahallesinde vâki‘ menzilimde huzûr-ı Müslimînde müddet-i mezkûrede benden bilâ-devr-i şer‘î ol kadar guruş ribh aldığını ikrâr ve i‘tirâf dahi edip ve benim dahi merkūm Sarrâf Sahak zimmîye hâlâ zimmetimde iki bin üç yüz seksen altı guruş deynim olmağın merkūm Sarrâf Sahak zimmîye suâl olunup yedimdeki fetvâ-yı şerîfe mûcebince bilâ-devr-i şer‘î benden aldığı meblağ-ı mezkûr beş bin sekiz yüz elli bir buçuk guruşun iki bin üç yüz seksen altı guruşunu deyn-i mezkûreme takās ve bâkī kalan üç bin dört yüz altmış beş buçuk guruş hakkımı bana red ve teslîmini taleb ederim deyü ba‘de’d-da‘vâ ve’s-suâl merkūm Sarrâf Sahak zimmî hâlâ müdde‘î-i mezbûr zimmetinde iki bin üç yüz seksen altı guruş hakkı olup ve mukaddemâ müddet-i mezkûrede bi’d-defa‘ât dahi müdde‘î-i mezbûr ile mu‘âmelât-ı ikrâz ve ahz ve istifâsı olduğunu ikrâr lâkin müdde‘î-i mezbûrdan bilâ-devr-i şer‘î beş bin sekiz yüz elli bir buçuk guruş ribh aldığını ve ber-vech-i muharrer ikrârını külliyyen inkâr etmeğin müdde‘î-i mezbûr müdde‘âsını ahrâr-ı ricâl-i Müslimînden lede’t-tezkiye adâletleri zâhir olan eş-Şeyh Süleyman Efendi b. Ahmed ve Osman Ağa b. Mahmud ve Hüseyin Çavuş Ağa b. Hüseyin ve Osman Beşe b. Mehmed ve el-Hâc Abdülhalim Ağa b. el-Hâc Yahya nâm kimesneler şehâdetleriyle merkūm Sarrâf Sahak zimmî muvâcehesinde vech-i şer‘î üzere ba‘de’l-isbât ve’l-kabûl mûcebiyle hükmolunup meblağ-ı mezbûr beş bin sekiz yüz elli bir buçuk guruşun iki bin üç yüz seksen altı guruşunu müdde‘î-i mezbûr zimmetinde olan ol kadar deynine takās ve bâkī kalan üç bin dört yüz altmış beş guruşu müdde‘î-i mezbûra red ve teslîmle merkūm Sarrâf Sahak zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 9 Şa‘bân sene 1162