Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 289 Hüküm no: 328 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hasan’ın, eksik ödeme yaptığı ve alacağı olduğu iddiasıyla yanında çalıştığı Ayvansaray Hamamı hamamcısı Hacı Hasan b. Hüseyin’e açtığı davayı ispat edemediği Ma‘rûz Sahib-i arzuhâl İsmail b. Hasan meclis-i şer‘-i hatîrde derûn-ı arzuhâlde mezkûr Ayvansara[y] Hamamı hamamcısı el-Hâc Hasan b. Hüseyin muvâcehesinde ben ücret ile hizmet eder makūlesinden olup talebiyle mezbûr el-Hâc Hasan’a ücret kavlinsiz iki buçuk sene hamam-ı mezkûrda peştemal gassâllığı hizmetini edip müddet-i mezkûrede olan hizmet-i mezkûre için bana ecr-i mislimden nâkıs yevmî ikişer para ücret vermekle müddet-i mezkûrede olan bakıye-i ecr-i mislim ile hamam-ı mezkûrda nâtırlık şâkirdliğim kisbinden müddet-i mezkûrede bi-gayr-ı hakkın yedimden ahz eylediği cem‘an yüz guruş hakkımı taleb ederim deyü ba‘de’d-da‘vâ ve’s-suâl mezbûr Hamamcı el-Hâc Hasan cevâbında fi’l-vâki‘ müdde‘î-i mezbûrun müddet-i mezkûre peştemal gaslini ikrâr lâkin peştemal gassâllığının ecr-i misli yevmî kabzını i‘tirâf eylediği ikişer paradan ziyâde olduğunu ve müdde‘î-i mezbûrun kisb-i mezkûrundan yüz guruş aldığını inkâr etmeğin müdde‘î-i mezbûrdan müdde‘âlarını beyândan ızhâr-ı acz birle lede’l-istihlâf ve’t-tahlîfi’ş-şer‘î mûcebiyle müdde‘î-i mezbûr İsmail bilâ-beyyine-i âdile da‘vâ-yı mezkûreleriyle mezbûr el-Hâc Hasan’a bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 8 Şa‘bân sene 1162