Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 290 Hüküm no: 329 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mehmed’in Gürcü asıllı diye satın aldığı cariye Fâtıma’nın Erzurumlu ve hür olduğunu ispat etmesiyle azat edildiği Bâ-mühr-i hazret-i efendi Ma‘rûz Rıkka inkıyâdını mu‘terife orta boylu açık kaşlı elâ gözlü Müslimetü’l-mille Fâtıma nâm hatun dîvân-ı âlîlerinde ma‘kūd kendiye rıkka olmak üzere vâzı‘u’l-yed olduğu mütehakkık olan Kara Mehmed Beşe b. Şa‘bân ile terâfu‘larında ben medîne-i Erzurum’a tâbi‘ Ortuzu nâm karye ahâlîsinden hürretü’l-asl Râziye nâm hatundan mütevellide hürreyim deyü ba‘de’d-da‘vâ ve’s-suâl mezbûr Mehmed cevâbında ben merkūmeyi bundan akdem Gönye sancağında Belvan nâm mahâlde Hüseyin b. İsmail nâm kimesneden Gürciyyetü’l-asl memlûke olmak üzere iki yüz seksen guruş semen-i medfû‘a iştirâ etmemle yedimde câriye-i memlûkem olduğundan vaz‘-ı yed ederim ber-minvâl-i muharrer hürre olduğu ma‘lûmum değildir deyü inkâr etmeğin mevsûfe-i mezbûre Fâtıma müdde‘âsını udûlden olan İsmail b. Ömer ve Musa b. Kalemkârzâde Osman nâm kimesneler şehâdetleriyle merkūm Kara Mehmed muvâcehesinde ba‘de’l-isbât mûcebince hükm birle mezbûre Fâtıma’nın sebîli tahliye olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 10 Şa‘bân sene 1162