Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 59 Hüküm no: 20 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niksar’ın Hevekse köyündeki Kâtib Nasuh Vakfı’na ait cüzhanlık cihetinin Seyyid Mehmed’e tevcihi Ma‘rûz, Niksar kazâsına tâbi‘ Hevekse nâm karyede vâki‘ Kâtib Nasuh Vakfı olup senevî bir hatm-i şerîf tilâvet etmek üzere karye-i mezbûre mâlikânesinden vazîfe-i mu‘ayyene ile hatimhanlık ciheti Mustafa b. Halil’in üzerinde olduğu askerî rûznâmçesinden derkenâr olunmağla meâl-i arz ve derkenâra nazaran iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Mehmed b. Hüseyin ve Ahmed b. Ömer nâm kimesneler meclis-i şer‘a celb ile keyfiyeti gereği gibi suâl olundukda derûn-ı arzda tahrîr ve inhâ kılındığı üzere mezbûr Mustafa’nın bilâ-veled fevti ve dârende-i arz merkūm es-Seyyid Mehmed’in cihet-i mezkûreye ehliyeti ve istihkākı olduğunu herbiri alâ-tarîkı’ş-şehâde ihbâr etmeleriyle bu sûretde cihet-i mezkûre müteveffâ-yı mezbûrun bilâ-veled mahlûlünden merkūm es-Seyyid Mehmed’e tevcîh olunmak bâbında emr [ü] fermân hazret-i men-lehu’l-emrindir. Fî 11 M sene [12]48