Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 297 Hüküm no: 341 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve annesi Ayşe Hatun’un, borçlarına karşı rehin verdikleri vakıf menzilin kendilerine geri verilmesi talebiyle Hacı Osman ile vakfın mütevellisi İsmail’e açtıkları davada sulh oldukları Ma‘rûz Arzuhâl sahibleri Mustafa ve anası Âişe Hatun zâtı ba‘de’t-ta‘rîfi’ş-şer‘î meclis-i şer‘de arzuhâlde mezkûr zikri âtî vakıf menzile vâzı‘u’l-yed olan el-Hâc Osman muvâcehesinde mütevellî-i vakf İsmail nâm kimesne hazır olduğu hâlde İstanbul’da Balatkapısı kurbünde Hoca Kasım Gönânî mahallesinde Handanzâde Ahmed Ağa Vakfı’ndan ber-vech-i iştirâk tasarrufumuzda olan vakıf menzilimizi mukaddemâ işbu hazır bi’l-meclis Gürcü Osman’dan istidâne eylediğimiz yüz elli guruş mukābelesinde vefâen fâriğ olmuş iken mezbûr Gürcü Osman dahi menzil-i mezbûru mezbûr el-Hâc Osman’a fâriğ olmağla kasr-ı yedine mezbûr el-Hâc Osman’a tenbîh murâdımızdır deyü ba‘de’d-da‘vâ ve’l-münâza‘a mezbûr Mustafa ve anası mezbûre Âişe bâ-vesâtet-i muslihîn mezbûrân el-Hâc Osman ve Gürcü Osman ile elli guruş bedel-i makbûza sulh olup husûs-ı mezkûra müte‘allika âmme-i da‘vâdan herbiri âharın zimmetini ibrâ ve ıskāt edip kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 11 Şa‘bân sene 1162