Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 298 Hüküm no: 342 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşehirli Mustafa Sipahi b. Veli’nin hemşehrisi Hacı Salih b. Hacı İsmail’e açtığı davasını ispat edemediği Ma‘rûz Vilâyet-i Anadolu’da Akşehir kasabası ahâlîsinden olup mahmiye-i İstanbul’da Sultan Bâyezid-i Velî Câmi‘-i şerîfi kurbünde sâkin Mustafa Sipâhi b. Veli meclis-i şer‘de yine kasaba-i mezkûre ahâlîsinden el-Hâc Salih b. el-Hâc İsmail muvâcehesinde târih-i i‘lâmdan yedi sene mukaddem zikrolunan Akşehir kasabası bedestânında mezbûr el-Hâc Salih’e kendi dükkânında yetmiş guruş ikrâz ol dahi iktirâz ve kabz edip hâlâ zimmetinde kalmağla taleb ederim deyü ba‘de’d-da‘vâ ve’l-inkâr mezbûr Mustafa Sipâhi ber-vech-i muharrer müdde‘âsını beyâna kādir olmamağla bi’t-taleb mezbûr el-Hâc Salih ba‘de’t-tahlîfi’ş-şer‘î mûcebince mezbûr Mustafa Sipâhi bilâ-beyyine bî-vech mu‘ârazadan men‘ olunduğu mübâşirleri İsmail Çavuş iltimâsıyla Mahkeme-i Bâb’dan huzûr-ı âlîlerine i‘lâm olundu. Fî 16 Şa‘bân sene 1162