Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 299 Hüküm no: 344 Orijinal metin no: [44a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lüleci İbrahim’in, boşandığı hanımı Şerife Hatice’ye olan mehir ve nafaka bedelini ödemesi Ma‘rûz Arzuhâl sahibesi Şerife Hadîce meclis-i şer‘-i enverde derûn-ı arzuhâlde mezkûr Lüleci İbrahim muvâcehesinde mezbûr İbrahim zevcim olup târih-i i‘lâmdan otuz beş gün mukaddem Üsküdar’da Ahmed Çelebi mahallesinde sâkin iken beni bâinen tatlîk etmekle zimmetinde mütekarrer üç bin akçe mehr-i müeccelim ile nafaka-i iddet ve meûnet-i süknâmı taleb ederim deyü da‘vâ ol dahi cevâbında mezbûre Şerife Hadîce mukaddemâ zevcesi olup üç bin akçe mehri olduğunu ikrâr lâkin târih-i mezkûrda mehr-i mezkûru ve nafaka-i iddet ve meûnet-i süknâsı kendi üzerine olmak üzere benimle muhâla‘a oldukda ben dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika da‘vâdan birbirlerimizi ibrâ etmişidik deyü ba‘de’d-def‘ ve’l-inkâr mezbûr İbrahim def‘-i mezkûrunu beyâna havâle olundukda kirâren ve mirâren mehl-i şer‘î birle ba‘de’l-imhâl müddet-i mehl mürûr ve bir vechile beyâna kādir olmayıp ve tahlîfe dahi tâlib olmamağla mûcebince üç bin akçe mehr-i mezkûr ile bakıye-i iddeti için bi’t-terâzî ta‘yîn olunan üç guruş ki cem‘an bin üç yüz altmış akçeyi mezbûre Şerife Hadîce Hatun’a edâ ve teslîme mezbûr Lüleci İbrahim’e tenbîh olunduğu Bâb’dan huzûr-ı âlîlerine i‘lâm olundu. Fî 18 Şa‘bân sene 1162